Адабий­-маданий мерос – халқимизнинг авлодлардан-авлодларга ўтиб келаётган ниҳоятда қадимий, бой адабий-­маданий мероси бор. У халқимизнинг урф-одати, расм-русумлари, байрамлари, қадимий битиклар ва археологик топилмалар, халқ оғзаки ижоди намуналари, ёзма бадиий адабиёт ва фан соҳасида яратилган ноёб асарлар, тасвирий ва амалий санъат ҳамда мусиқа дурдоналари, бетакрор меъморий обидалардан иборат. Собиқ иттифоқ даврида юртимиздаги бой адабий-­маданий меросга бутунлай нотўғри, мафкуравий муносабат ҳукмрон бўлди. Истиқлол туфайли бу борадаги муносабат тубдан ўзгарди, адабий-­маданий меросни тиклаш, асраб-авайлаш, тарғиб ва ташвиқ этиш бўйича кенг кўламли ишлар ҳозирги кунда ҳам изчил давом эттирилмоқда.