Технократия (юнонча техника ҳукмронлиги, ҳокимияти) –

1) техник ходимлар ва мутахассисларнинг сиёсий ҳокимияти зарурлигини тан олувчи социологик концепция;

2) ХХ асрнинг 30-йилларида АҚШдаги ижтимоий ҳаракатнинг номланиши.

Технократия назарияси дастлаб Веблен томонидан қўлланган. У «Технологик детерминизмга» эътиборни қаратган ҳолда, техник мутахассисларни ишлаб чиқариш ва ижтимоий тараққиётга содиқ хизмат қилувчилар, деб билган. Бунинг учун улар бирлашиб, мамлакат саноат ишлаб чиқаришида муҳим бошқарув лавозимларини эгаллаши кераклигини эътироф этган. А.Берл, А.Фриш кабилар технократия концепциясининг янада ривожланишига ҳисса қўшганлар. Айниқса, Ж.Голбрайтнинг «Янги индустриал жамият», «Иқтисодий назариялар ва жамиятнинг мақсади» каби китобларида технократия ғояси атрофлича асослаб берилган. Кейинги йилларда бу тушунча техник тамойилларни устувор билувчи сиёсий доираларга нисбатан ҳам ишлатилмоқда.