Медитация (лотинча meditatio – фикрлаш) – ақлий фаолиятни муайян бир нарсада тўлиқ жамлаш ҳолати. Бу жараён муроқаба деб ҳам аталади. Ақл инсоннинг барча ҳис-туйғулари фаолиятини бошқариб турувчи субстанция ҳисобланади. Агар инсоннинг ақли муайян нарса (объект) ҳақидаги ўйлар билан машғул бўлса, ақл бошқараётган ҳис-туйғулар ҳам, ўзларининг бошқа ҳаракатларини тарк этиб, шу жараён билан банд бўлади. Муроқаба жараёнида инсон ўзининг ҳиссиётлари орқали тасаввур қилиш мумкин бўлган объект (қиёфа) бўлиши шарт. Муроқабага тасаввуфда, суфийлар таълимотида муршид ва мурид киришади. Медитация билан асосан йоглар шуғулланади. Муроқаба қилиш объектлари, яъни йог олдига қўйган мақсадларига мувофиқ жараён ҳар хил бўлади: дхян-йога, карма-йога, бхакти-йога ва ҳоказо.