O‘lan – xalq ijodi janri, qo‘shiq turi. Dehqonlar, ayniqsa, chorvador xalqlar orasida keng tarqalgan. Asosan ayollar, qisman erkaklar tomonidan childirma (doira) jo‘rligida ijro etiladi. O‘lanlar ba’zan savol-javobli qo‘shiq tarzida, ba’zan ikki kishi tomonidan dialog shaklida ham aytiladi. Har bir to‘y marosimiga xos o‘lanlar mavjud. O‘zbeklarda “Nikoh to‘yi” marosimida qizlar bir tomon, yigitlar bir tomon bo‘lib; “qiz oshi” (lapar, qiz ziyofati) marosimida qizlar birgalikda jo‘r ovoz bo‘lib: “Chorlari”, “Chaqirdi”, “Beshik to‘yi” marosimida ayollar yakka va jo‘r ovoz bo‘lib o‘lan aytishgan. O‘landa xalqning orzu-umidlari, qayg‘u va shodlik kayfiyatlari o‘z ifodasini topadi. Xalq orasida muhabbat mavzusiga bag‘ishlangan va hajviy o‘lanlar keng tarqalgan. O‘lan “yor-yor” qo‘shiqlariga yaqin bo‘lib, ayrim o‘lanlarda har bir misra “yor-yor” radifi bilan aytiladi.