Alpomish – oʻzbek xalqining ming yillar davomida yaratilgan qahramonlik dostoni. U xalqimiz orasida juda keng tarqalgan va asrlar davomida baxshilar tomonidan kuylab kelingan. “Alpomish” dostoni – butun oʻzbek xalqining maʼnaviy mulkidir. Mustaqillik imkoniyatlaridan biri sifatida milliy iftixorimiz boʻlgan “Alpomish” dostonining toʻla ravishda xalqimizga yetkazilishi madaniy taraqqiyotimizdagi ulkan voqeadir. “Alpomish” dostoni qon-qardosh turkiy xalqlar, shu jumladan, uning katta bir boʻlagi – oʻzbeklar orasida qadim-qadim zamonlarda xalq donoligi-yu, baxshi-shoirlar zukkoligi, katta talant-isteʼdodlari tufayli yaratilgan. Doston asrlar davomida avlod-ajdodlar, yoshlarning maʼnaviyati, madaniyati, axloq-odobi, ulardagi Vatan, millat tuygʻularini oʻstirish, shuningdek doʻst-birodarlik, oriyat, mardlik, bahodirlik, pahlavonlik, qatʼiyatlilik kabi fazilatlarni shakllantirish va kamolga yetkazishda muhim ehson, muhim tarbiya vositasi boʻlib kelgan. “Alpomish” ota-bobolarimiz ijodiy dahosining bebaho badiiy yodgorligi, jahon xalqlari epik ijodiyoti namunalari ichida alohida oʻrin tutuvchi, mustaqil rivojlanishimiz davrida millat birligi va maʼnaviy uygʻonish, milliy gʻurur va oʻz-oʻzini anglash ramzidir.

Bu doston yaratilganligining katta toʻyini xalqaro nufuzli tashkilot UNESCOning 1999-yildagi tadbirlari rejasiga kiritilgan. “Alpomish” dostoni yosh avlodni mardlik, jasurlik, oriyat, yuksak axloq, pok muhabbat, muhabbatga sadoqat, diyonat, imon-eʼtiqod, mehnatga ishtiyoq, yurtsevarlik, xalqparvarlik, oilaga, Vatanga fidoyilik ruhida tarbiyalaydi.