Ona yuragi

Tez yordam mashinasida shifoxonaga olib ketilayotgan jonsarak Rahima opa kenjatoy oʻgʻlining ertaga maktabga kiyadigan oq koʻylagini yuvish esidan chiqqani uchun ezilardi...

Umr

“Bir paytlari bu qishloqning koʻchalari tor, odamlarining koʻngli keng boʻlardi. Hozir teskarisi...” – deya xoʻrsindi oʻlim toʻshagida yotgan boboy.

Qismat

– Oyijon, nega chumolilar qora rangda boʻlishadi? – deya soʻradi umid toʻla koʻzini onasiga qadab.

Beva ona horgʻingina javob qaytardi:

– Har daqiqada bir yaqini qurbon boʻlavergach, kiyim almashtirib yurishga vaqti yoʻq-da, bolajonim...

Nadomat

– 3 ta qizning baxtiyor onasi ekansiz!

– Ha... Ularning faqatgina baxtiyor onasi bor...

“Yovuz” qaror

Uzoqdan uni koʻrgan yigit “Qanchalik qiyin boʻlmasin, u bilan bugun doʻstligimizga nuqta qoʻyaman...” deya oʻyladi. Unga yaqinlashgach, faqat uchta soʻz aytdi: “Men seni sevaman!”

Rahmat BOBOJON