Moʻjiza

“Agar bu xabarni beshta odamga yuborsangiz, moʻjiza sodir boʻladi”. U xabarni oʻqib boʻlgach, bir qancha odamga yubordi. Birozdan soʻng kayfiyati buzildi: “Qani, hech nima sodir boʻlmadiku?” Yonidagi singlisi hazil aralash: “Shuni anglab yetganingizning oʻzi bir "moʻjiza” emasmi?" – dedi piching bilan opasiga...

Metroda

Ovoz yangradi: “Iltimos, yosh bolali, nogiron, yoshi katta odamlarga joy bering!”

Qishloqdan endi kelgan, sochlariga oq oralagan otaxon maʼyus jilmaydi: “Shaharda hech boʻlmaganda yer tagida oqibat bor ekanku...”

Maktub

Oradan 20 yil oʻtib oʻgʻildan xat keldi: "Odam boʻlishimga oz qoldi, ona!”

Umidvor ona

Shamning soʻnggi shuʼlalari taralarkan, ona urushdagi oʻgʻlining kiyimlari yoniga nevarasiga deb tikkan nimchasini mamnun alfozda solib qoʻydi... Tongotar kelgan pochtalyon esa qora xatni qanday qilib Roʻzi momoga berishni bilmay, eshik oldida qoldirib ketdi...

Umr

Men tugʻildim...

Mudhish xato

– Oyijon, toʻqqiz oy meni qorningizda koʻtarib yurganmisiz?

– Albatta, qizalogʻim...

– Nega unda toʻrt oylik paytim tugʻilganman?

Rahmat BOBOJON