Andijonlik novvoylar

Uyining roʻparasida Andijondan kelgan novvoylarga kuzatib turgan qizaloq dedi:

– Oyi, bularga nima azob ekan- a, Andijonning oʻzida non yopib sotsa boʻlmaydimi?

– Unday dema, ular ham sening dadang Qozogʻistonda yurganday yuribdida.

Hurziya Jumabayeva

Qora xat

“Mana, mana hozir u eshikdan kulimsirab kirib keladi”. Ona soʻnggi soʻzini aytarkan, qoʻlidan oʻttiz yil oldingi, sargʻayib ketgan “qora xat” yerga tushdi...

Shaxnoza Askerbayeva

«Orginal» farzand

Jahli chiqqan bolakay sut toʻla bankani simyogʻochga urib sindirib: «Men senga Umrbek laqqining bolasimanmi?», dedi qizarib turgan yuzini ushlab.

Islombek Mambetniyazov

Qidiruv

Seni shaharda koʻp joylardan izladim, yangi solingan koʻp qavatli uylardan, maktab-bogʻchalardan, hatto bozordan... Topolmadim...

Qishlogʻimizga borib yoshi kattalardan surishtirdim. Ular sening shaharga koʻchib ketganingni aytishdi, VIJDON!?

Malika Navruzbayeva

Onalik mehri

Qish. Mushukning bolalari adashtirildi. Izladi. Topmadi. Tunda eski mashinada yotgan daydi mushukchani topib, erkaladi. Tong. Mushukcha qoʻrqib onasining pinjiga tiqildi. Nariroqda qarovsiz sumkani odamlar ichida pul bordir deb talasha boshlashdi. Undan esa qiyiqkoʻz, muzlagan goʻdak chiqdi.

Madina Xajiyeva

Qoraqalpoq tilidan Nodirbek YOʻLDOSH oʻgirdi.
Foto: Xolida MUSULMONOVA