Bajarilmas vaʼda

– Menga qachon velosiped olib berasiz, hamma joʻralarimda borku.

– Maktabdan “5” baho olib kelsang olib beraman.

– “Muallim, menga «5” qoʻymang, iltimos», derdi, kambagʻal otasining vaʼdasi bajarilmay, qisinib qolishini istamagan bola.

Tazabay Yuldashev

Yolgʻon

Onam tashvish qilmasin, deb kasalligini ancha vaqt yashirib yurdi. Attang, jonsiz tanasini yashirolmasligini tushunguncha kech boʻlgandi...

Meyrambek Abdiqaliyev

Xato

Onasiga har doim aralashmang, derdi. Keyin birdan jimib qoldi... Boshqa bunday demayman, dedi. Endi bunday demasligi aniq... U qabr ustiga gul qoʻygancha uyiga qaytdi.

N.Qidirniyazov

Qisqa umr

Ona bolasini qosh qorayganda molxonadan tuxum olib kelishga yubordi. Kelavermagach, sannay-sannay molxonaga kirib, tuxumni emas, besh yashar bolakayning jonsiz tanasini olib chiqdi.

Sanavar Jumaniyazova

Orzu

24 yoshli yigitning aytgan gapi:

“Katta boʻlsam men ham shunaqa mashina olaman”...

Ikrom Bekberdiyev

Deputat

Deputatlarimizdan biri konferensiyada chiqib maqtandi: “Oʻzbekiston avtomobil ishlab chiqaruvchi 28 davlatning biri”.

Biroq, u avtomobil olish uchun byudjet xodimi 28 yil maoshini yemay-ichmay yigʻishi kerakligini aytmadi.

Marat Mamutov

Qoraqalpoq tilidan Nodirbek YOʻLDOSH oʻgirdi.

 Foto: Xolida MUSULMONOVA