Tugʻilgan joy

U sharqirab oqib turgan daryodan obkashda suv tashirdi. Suv juda shirin, koʻp vaqtga yetardi. Endi u boshqa joyda. Suv ham uy ichidan chiqadi-yu, lekin taʼmi yoʻq.

Qoʻrquv

U har doim oʻlaman deb qoʻrqitardi: gohida pichoq bilan, gohida arqon bilan. Birov uni boʻgʻib oʻldirmoqchi boʻlganida, oʻlmaslikka astoydil harakat qildi. Ammo urinishlari besamar ketdi.

Hayrat

– Ustoz, 2000-yildayoq beshinchi okean xaritaga tushgan, – dedi shogird quvonib, goʻyo oʻsha okeanni oʻzi kashf etgandek.

– Ertakchiga oʻxshaysan, gʻoʻldirab... – Sirtqini tugatgan muallima zahrini sochib gapirdi.

– Men... men televizorda koʻrdim, – dedi oʻquvchi sinfdoshlarining kulgisidan hayratlanib.

Moskva

– Eh, Moskva! Mening borishim faqat orzu boʻlib qoldi, oʻgʻlim... – ota koʻzlari quvnab, dadil gapirdi.

– Mening sogʻligim qoldi Moskvada... – soʻzladi bola zaif va beparvo...

Qaytish

Berayotgan bilimimni toʻgʻri qabul qilinglar, boʻlmasa qaytarasizlar, dedi domla.

Aytganidek, sessiya paytida talabalarning saqichga ham puli qolmadi.

Qoʻshnilar

U yangi uyga koʻchib keldi. Chap tarafdagi qoʻshnilar juda janjalkash edi. Ammo u bunga parvo qilmasdi. Baribir oʻng tarafdagi qoʻshnilarga oʻxshab tinchlanishar, derdi xayolida.

Uyning oʻng tomoni qabriston edi.

Kauhar BIYMAMAT qizi

Qirgʻiz tilidan Nodirbek YOʻLDOSH oʻgirdi