Kattalar hech qachon o‘zlaricha biron narsani tushuna olmaydilar, ularga hadeb hijjalab tushuntirib beraverish esa oxir-oqibat bolalarning ham joniga tegib ketadi.

***

Boshing oqqan tomonga ketaverganing bilan uzoqqa ketolmaysan...

***

Mabodo kattalarga: “Men qizg‘ish g‘ishtli chiroyli bir uyni ko‘rdim, derazasida yorongul ochilib turibdi, tomida kaptari bor”, deb aytsangiz, ular bu imoratni sira ham ko‘z o‘ngilariga keltira olmaydilar. Ularga: “Men yuz ming frankli uyni ko‘rdim”, deb aytish lozim – shundagina ular: “Ana go‘zallig-u mana go‘zallik!”, deya xitob qiladilar.

***

...dunyoda do‘stlarni unutib yuborishdan ham qayg‘uliroq narsa yo‘q, axir do‘st bo‘lish har kimga ham nasib etavermaydi-da.

***

Bilasanmi... ba’zan yuraging nimadandir g‘ussaga to‘lib ketganda, botayotgan quyoshga birpas termulib o‘tirsang bormi...

***

Aytaylik, men bu dunyoda na tengi, na o‘xshashi bo‘lgan bir gulni bilaman, u faqat mening sayyoramdagina o‘sadi. Endi bir kuni jimitgina qo‘zichoq shartta borsa-yu uni paqqos yeb bitirsa! Nima ish qilib qo‘yganini hatto xayoliga keltirmasa...

***

Agar boshqa millionlab yulduzlarda uchramaydigan bir gulni yaxshi ko‘rsang, shuning o‘zi kifoya: osmonga boqqaning zamon o‘zingni baxtiyor his etasan. “Olislarda, qaydadir mening ham gulim bor”, deb shivirlasang bas – ko‘ksing tog‘dek yuksalib ketadi.

***

Osongina fosh bo‘lishing muqarrar vaziyatda yolg‘on gapirmoq – borib turgan axmoqlikdir!

***

O‘zingni tergash, sud qilib hukm chiqarish o‘zgalarni sud qilishdan ko‘ra ming karra qiyinroq. Agar o‘zingni to‘g‘ri sud qila bilsang, demak, chindan ham donishmand odam bo‘lib chiqasan.

***

Hozir odamlarning biror narsani bilishga vaqti qolmagan. Hamma narsani tayyorligicha do‘kondan olishadi. Lekin do‘st sotadigan do‘kon yo‘q-da, shuning uchun ham odamlar endi do‘st orttirmaydi.

***

Faqat bolalargina nima izlab yurganini bilishadi, – dedi Kichkina shahzoda. – Ular latta qo‘g‘irchoqqa ham yurak-bag‘rini berib mehr qo‘yadi, shu sababli u ularga benihoya qadrli bo‘lib qoladi. Shu sababli ham boladan qo‘g‘irchog‘i tortib olinsa, o‘ksib-o‘ksib yig‘laydi...

***

Sahro menga hamisha yoqadi. Qum barxaniga chiqib o‘tirasan, hech narsa ko‘rinmaydi, hech narsa eshitilmaydi, ammo baribir sahro qo‘ynida nimadir bilinar-bilinmas yaltiraydi...

***

Eng asosiy narsani ko‘z ilg‘amaydi, u siyratda, botinda pinhon...

***

Odamlar jon-jahdi bilan tezyurar poyezdlarga oshiqib, nima izlayotganini o‘zlari ham anglamaydi... Shuning uchun ham orom neligini bilmay goh bir tomonga, goh ikkinchi tomonga zir yuguradilar. Lekin bari behuda...

Bekzod SAYFIYEV tayyorladi.