2012 yil soliq kollejida direktor edim.  Katta kurs kursantlarni yakshanba kuni kunlik paxta terimiga hasharga olib bordik,  Yangiyo‘l tumaniga. Dala aylanib yursam, bolalarning to‘dalashib yugurganiga ko‘zim tushdi.  Chopib bordim.  Borsam ikkita 3-kurs kursant 70 yoshga kirgan general unvonidagi domlani uribdi,  tepgan.  Domlani labi yorilgan.  Bolalar yugurib borib ajratibdi.  Darhol o‘shattagi navbatchi milisiyaga protokol qildirib,  sudga oshirdim.  

Ertasiga bolalarning otalari kelishdi.  Xudoni zorini qilishdi,  sudlanmasin,  shuncha o‘qigani bir pul bo‘ladi deb.  Bolalaram yig‘lab kechirim so‘radi.  Sababi,  uchastka milisiya noziri,  agar direktor arizasini qaytib olsa sudga oshmaydi,  kelishinglar debdi.  Men: 

– Agar ikkita bola o‘zaro mushtlashsa mayli edi,  yarashtirardik,  bular ustoziga qo‘l ko‘tardi.  Domlalarni orasida ham so‘kadigani,  uradigani bor,  o‘shalar bo‘lgandayam mayli edi.  So‘rangchi, shu domla birorta bolani so‘kish tugul san deb gapirgan ekanmi? – dedim. 

 Domla haqiqattan hokisor,  kamtar va xushxulq inson edi.  Shundayam general ustoz meni oldimga kirib,  kechira qolaylik deydi.  Ko‘zini ko‘kargani ketmagan, labini shishgani ham.  Yo‘q deb turvoldim.  Suddan jarima bo‘lib o‘tdi. General domla keyin nafaqaga ketib qoldilar. 

Oradan 6 yil o‘tib,  kabinetda o‘tirsam yordamchim sobiq bitiruvchilardan biri kirmoqchi ekanini aytdi.  Men bilan Oliy majlis deputati va yana bir senator o‘tiruvdik.  Tadbir bor edi,  konstitusiya kuniga.  Tadbirdan keyin kirsin deb,  tadbirga chiqib kettim.  

Bo‘shaganimdan so‘ng uni so‘radim.  Shunda o‘rinbosarim Mavlon aka: 

– U ketdi.  O‘qishni tamomlab Rossiyaga borib ishlabdi.  Yog‘och tilish sexida.  Shunda 4 ta barmog‘ini uskuna yamlab ketibdi.  Bir qo‘lida 4 ta barmog‘i yo‘q,  nogiron bo‘lib qolibdi,  kecha 3-guruh nogironligini 2-guruhga o‘tkazishga hujjat topshiribdi.  O‘shanda dalada “Domlani urgan qo‘llaring sinib,  nogiron bo‘lib qolgin”  deb qarg‘agan ekansiz.  Pushaymon,  domladan kechirim so‘rashdan avval sizdanam so‘ray deb kelibdi.  Ketib qoldi,  boshqa kuni kelarkan, – dedi.  

Badanimdan muzday ter chiqdi... Allox uchun uni kechirdim dedim.  

Xech qachon ustozni og‘rintirib bo‘lmaydi...

Bahriddin ASROR