Voqea bundan bir necha yil ilgari, Toshkent viloyati hokimiyati Toshkent shahrida joylashgan paytda ro‘y bergan.

Xullas, Ohangaron tumani Uvak mahallasi fuqarolaridan birining shikoyat arizasiga ko‘ra, viloyat hokimligi mas’ullaridan biri MFY raisi, tuman bosh arxitektori va tuman Obodonlashtirish boshqarmasi rahbarlarini chaqirtiradi.

Hokimlikka kiraverishda IIB xodimi ularning shaxsini tasdiqlovchi hujjatlarini so‘raydi.

Dastlab MFY raisi Ikrom aka pasportini ko‘rsatadi.

– Familiyangiz?

– Bo‘riyev.

– Yaxshi, keyingisi.

So‘ngra tuman bosh arxitektori Rustam aka pasportini uzatadi.

– Familiyangiz?

– Yo‘lbarsov.

– Iye, zo‘r-ku (kulib qo‘yadi).

Eng oxirida IIB xodimi tuman Obodonlashtirish boshqarmasi boshlig‘i Fayzulla akaga qarab:

– Pasportingiz?

– Qo‘y, ukam, shuni so‘ramay qo‘yaqol! (hazil aralash)

– Beraqoling, amaki!

Xodim Fayzulla akaning familiyasini o‘qib, kulib yuboradi.

– Sherov!

Qattiq kulgu ko‘tariladi. Eng qizig‘ini eshiting! Shunda IIB xodimi:

– Qayerdan kelyapsizlar?

– Ohangaron tog‘laridan.

– Kimning oldiga?

– Qo‘chqorovning.

Shu joyini eshitgandan keyin, qotib qoldim. Shunaqasiyam bo‘larkan-da. O‘sha vaqtda Qo‘chqorov degan odam viloyat hokimligida qurilish kotibiyatida ishlagan ekan, qahramonlarimiz aynan shu kishining oldiga borishgan. Rostdan bo‘lgan voqea, ataylab qidirib ham bunday hodisani sahnalashtirolmaysiz.

Ana shunaqa...

 Elyor O‘TBASOV