Farosati sust odamni hayotda quyidagi holatlarga yo‘l qo‘yishiga ko‘ra aniqlash mumkin:

1.  O‘zini boshqalarning o‘rniga qo‘ya olmaydi. Biror ishni bajarishni rejalashtirsa, buning natijasiga boshqalar qanday qaragan bo‘lar edi, deb tasavvur qila olmaydi.

2. Biror bir ish qilayotgan bo‘lsa, buning boshqalarga qanday ta’sir etayotgani, yoqishi yoki yoqmasligini o‘ylay olmaydi.

3. Ehtiroslarga beriluvchan bo‘ladi, ayniqsa, jahli chiqqan, kayfiyati buzilgan holatlarda o‘zini tuta olmaydi.

4. Boshqalarni sabr qilib oxirigacha eshita olmaydi, o‘zini hamisha “to‘g‘ri qilyapman”, deb biladi.

5. Atrof-muhitda yuz berayotgan jarayonlar va holatlar mantig‘ini tez fahmlay olmaydi.

6. Jamoaviy bajarilayotgan ishlar paytida o‘z xatti-harakatlari boshqalarga xalal berayotganini anglamaydi.

7. Pokizalikka, tozalik, orastalikka e’tibor qilish masalasida did va saviyasi past bo‘ladi, bu borada umumiy qabul qilingan qoida va me’yorlarga rioya qila olmaydi.

8. Yurishi, turishi, o‘tirishida o‘zini besaranjom tutadi, ehtiyotkorligi zaif bo‘ladi. Bexosdan qo‘lidagi narsalarini tushirib qo‘yadi yoki to‘kib yuboradi.

9. Muloqot paytida masala hamma kutgan yechimga borayotgan bir paytda dabdurustdan muammoning hal etilishiga mantiqan zid keluvchi fakt yoxud fikrni o‘rtaga tashlaydi va o‘zi anglamasdan ham o‘ziga, ham jamoa zarariga ishlab qo‘yadi.

10. Majlis va suhbatlarda vaqt me’yorini saqlay olmaydi. So‘z berilganda umumiy qabul qilingan va belgilangan vaqt reglamentiga rioya qila bilmaydi, yig‘ilgan odamlarning majlis cho‘zilayotganidan noroziliklarini his eta olmaydi.

Mansur BEKMURODOV