Bog‘. O‘yingoh atrofida o‘tirgan erkak yoniga bir notanish ayol kelib o‘tirdi va «Anavi mening o‘g‘lim» dedi qizil jemper kiygan bolani ko‘rsatib.

–Juda aqlli bolaga o‘xshayapti. Anavi oq ko‘ylakda, velosiped uchayotgan qiz esa mening qizim, – dedi erkak.

Shu payt soatiga qarab, qizini chaqira boshladi.

–Melissa, uyga qaytsak nima deysan?

–Dadajon, yana besh daqiqa. Iltimos, besh daqiqagina, dadajon.

Ota bosh irg‘ab rozilik bildirdi. Melissa bog‘ bo‘ylab velo sayrini davom ettirdi. Bir necha daqiqa o‘tgach, ota yana qizini chaqira boshladi.

–Endi ketsak bo‘lar, qizim?

Melissa «yana besh daqiqa, otajon, besh daqiqa» deya iltimos qila boshladi. Ota jilmaygancha rozi bo‘ldi. Vaziyatni ko‘rib turgan notanish ayol erkakka qarab «juda sabrli va mehribon ota ekansiz» deb maqtay ketdi.

Erkak kulimsirab, ayolga shunday javob berdi:

–O‘g‘lim – qizimning akasi Tommi o‘tgan yili, shu yerda, velosiped uchayotib, mast holda mashina boshqargan  haydovchining qurboniga aylandi. Men hech qachon Tommi bilan ko‘p vaqt o‘tkazmaganman, bu esa armonim, qizimga bo‘lsa besh daqiqa ko‘proq mehr berganimdan mamnunman. U velo sayri tugashiga yana besh daqiqa bor deya o‘ylaydi, aslida men uni tomosha qilib, zavqlanishim uchun yana besh daqiqa qo‘shaman, xolos!

Endryu XANT

Behzod Abdurahmonov tarjimasi