Baxt – ma’naviyat kategoriyasi, axloqiy ongi, kishining o‘z turmushidan mamnunlik, murod-maqsadga yetganlik holati, hayotining bekam-u ko‘stligi va muayyan ma’no kasb etganidan hosil qiladigan qanoati. Baxt yuksak ijtimoiy mazmunga, insonlarni muayyan maqsadlarga (baxtga erishish) chorlaydigan, ijobiy mohiyatga ega bo‘lgan kategoriyadir. Baxtning ziddi baxtsizlik hisoblanadi. Baxt ko‘pincha “Baxt-saodat” tarzida ham qo‘llanadi va barcha zamonlar hamda xalqlarda bir xil ma’noda keladi. Kategoriya sifatida baxtning turlari, namoyon bo‘lish shakllari va xususiyatlari ko‘p. Masalan, Vatan baxti, shaxs baxti, mehnat baxti, yor baxti, oila baxti, qarilik baxti va boshqalar. Bu har bir inson, millat, jamiyatning nimaga intilayotgani, nimani baxt deb tushunishiga, nimadan qanoatlanishiga bog‘liq.