Ko‘zlarimizni quvnatuvchi atlas, adras, beqasam, shoyi kabi gazlamalar qoʼlimizga yetib kelgunicha hunarmandlar qancha mashaqqat chekishini hammamiz ham bilavermaymiz. Bir to‘p – 300 metr atlas tayyor boʼlguniga qadar 30 ga yaqin turli bosqichlardan o‘tar ekan.

1. Dastlab 15 kilogramm xom ipak maxsus uskunada yigirib olinadi.

2. Xom ipak shirasini ketkazish maqsadida ishqorga solinib, qayta ishlanadi va g‘altaklarga o‘raladi.

3. Davra dastgohida bir usta, yaʼni davrakash kun davomida g‘altakdagi ipaklardan 300 metr atlas uchun kerakli o‘lchamdagi tandani tayyorlaydi.

4. So‘ngra davradan olinib, alohida-alohida o‘lchamlarda qatlanadi.

5. Matoda naqsh va gul chiqarish uchun ipak tolalar abrband dastgohiga tortiladi.

 6. Аbrband dastgohiga tortilgan iplarga usta gul soladi, naqshu nigorning qanday chiqishi, albatta, uning mahorati va zehniga bog‘liq.

7. Bo‘yoq berilmay oq rangda qoladigan joylari birma-bir bog‘lab chiqiladi. Chunki bo‘yash jarayonida aynan o‘sha qismlarga rang tegmasligi kerak.

8. Ipak tolalar abrbanddan yechib olinib, qozonda qaynab turgan bo‘yoqqa solinadi.

9. Keyin quyoshda ikki kun quritiladi, qish mavsumida bu ish ustadan ko‘p vaqt va mehnat talab etadi.

10. Quritilgan tandalarni qaytadan bir-biriga qo‘shish payti avval bog‘langan qismlari yechilib, gulabadorlik jarayonida yetti to‘quvchi 150–200 metrgacha tarang tortadi va kerakli o‘lcham bog‘ichlarini bog‘lab qo‘yadi.

11. Gulabardorlik nihoyasiga yetgach, o‘lchab olingan tanda qo‘ldo‘kon dastgohiga bog‘lanib, matoni to‘qish boshlanadi. Mohir usta bir kunda 6 metrdan 10 metrgacha atlas toʼqishi mumkin. 300 metrlik namozshomgul atlasini tayyorlash uchun bir oy vaqt ketadi.

12. Ipak matolarni tayyorlashda tabiiy bo‘yoqlar – yong‘oq, anor va piyoz po‘sti ishlatiladi. Аtlas va adrasning ranglari issiq-sovuqqa chidamli bo‘lib, har qanday ob-havoda ham 

o‘zgarmaydi.