Yangi yil bayrami haqida yaratilgan filmlardagi sirli voqealar, qiziqarli hodisalar, qish manzarasi, muhimi, ezgulik bilan tugovchi yakunlar kishiga o‘zgacha kayfiyat ulashadi. Dunyo bo‘ylab kattalar va bolalarga birdek yoquvchi badiiy va animatsion filmlar o‘ntaligini e’tiboringizga havola etamiz.

“Uyda yolg‘iz”

Bu kinokartina har Yangi yil arafasida telekanallarda rosa aylanadi, biz ham har gal miriqib tomosha qilamiz. 1990-yili katta ekranlarga chiqqan film o‘ttiz yildan oshibdiki, muxlislarini yo‘qotgani yo‘q. Kris Kolumbus rejissyorligida suratga olingan kartinada Mak Kalkin bosh rolni ijro etgan. Uning ikkinchi qismi ham dovrug‘ qozongan. Sakkiz yashar bolaning ikki o‘g‘rini chuv tushirish yo‘llari yumorga boy bo‘lib, asar zamirida oila muqaddasligi g‘oyasi ilgari surilgan. 

“Qor malikasi”

Ushbu multfilm Xans Kristian Andersenning mashhur ertagi asosida ishlangan. Rus rejissyori Lev Atamanov 1957-yili yaratgan kartinada yaxshilik va yomonlik kurashi tavsirlanadi. Gerdaning Qor malikasi o‘g‘irlab ketgan ukasi Kayni qutqarish yo‘lidagi sarguzashtlari bayon etiladi. Yuragi muzlab qolgan bolakayni mehr ko‘z yoshlari bilan o‘ziga qaytargan qizaloq alal oqibat Qor malikasini yengadi. Voqealar, tabiiyki, qish faslida, qahratonda yuz beradi. Bug‘u, qaroqchi qiz obrazlari ham muxlislarda yorqin taassurot qoldiradi.  

“Taqdir hazili yoki qushdek yengil bo‘ling!”

Roppa-rosa qirq besh yildan beri har Yangi yil arafasida teleekranlardan tushmay keladigan lirik komediyaning muxlislari bisyor. Rejissyor Eldar Ryazanov ishlagan film ilk tomoshadayoq 100 million muxlis yiqqan. Bosh rollarni Andrey Myagkov va Barbara Brilska ijro etgan. Muxlislar talabi bilan 2007-yili kartinaning mantiqiy davomi ham ishlandi, unda keksaygan qahramonlarimizning farzandlari ichakuzdi sarguzashtlarni boshdan kechirishadi. “Taqdir hazili...”dagi diltortar qo‘shiqlarni Sergey Nikitin va Alla Pugachyova kuylagan.

“Grinch – Yangi yil o‘g‘risi”

Hollivudning komediya janridagi mazkur filmida bosh rolni komik aktyor Jim Kerri ijro etgan. Kinoasar shu nomdagi ertak asosida 2000-yili “Universal Pictures” studiyasida ishlangan. Ertaknamo shaharda yashovchi aholi Yangi yilni nishonlamoqchi bo‘lganida yashil maxluq Grinch bayramni buzishga harakat qiladi, oxir oqibatda yaxshi tomonga o‘zgaradi. Kartina 345 million dollar daromad ko‘rgan.

“Zolushka”

1947-yili Sharl Perro ertagi asosida ishlangan «Zolushka» haligacha ekranlardan tushmaydi. Bosh rolni Yanina Jeymo ijro etgan. Premyera qilingach, bir yilda 18 million tomoshabin yiqqan. Film ommabopligi bois 2009-yili rangli formatda qayta ishlandi. O‘gay ona zulmi ostida yashovchi oqko‘ngil qizning shahzoda muhabbatiga noil bo‘lishidek juda qadimiy syujet ko‘plab yangidan yangi filmlarga asos bo‘lmoqda.

“Qarsildoq”

Gofman ertaklari va mashhur bastakor Chaykovskiy baleti asosida Soyuzmultfilm studiyasida Boris Stepansev tomonidan yaratilgan (1973). Asarda qo‘g‘irchoq qarsildoq va qizaloqning do‘stligi tavsirlanadi. Kalamushlar hujumiga qarshi kurashda ezgulik g‘olib chiqadi. Multfilm Ispaniyada “Bolalar va o‘smirlar filmlari” tanlovida birinchi o‘rinni olgan.    

“Niko”

2008-yili fin, nemis, daniyalik va irland ijodkorlari ishlagan multfilmda Yangi yil bayramining haqiqiy ruhini sezish mumkin. Qorboboning manzili, sovg‘alar tayyorlanishi va bug‘ular qo‘shilgan aravada dunyo bo‘ylab tarqatilishi voqealari bolalarning azaliy savoliga javob bo‘lsa, ajab emas. Yosh bug‘ucha Niko timsolida iroda va ishonch tuyg‘ulariga urg‘u beriladi. 

“Sohibjamol va maxluq”

Uolt Disneyning ushbu animasion filmi fransuz ertaklari asosida ishlangan. 1991- yili musiqali melodrama janrida suratga olingan asar yilning mashhur uchligida “Terminator 2” va “Robin Gud”dan keyingi pog‘onani zabt etgan. 1997-yili yaratilgan ikkinchi qismida Yangi yilni nishonlash mavzusi tasvirlanadi. Samimiy go‘zal qiz Bellning maxluq qiyofasidagi shahzodaga ko‘ngil qo‘yishi orqali surat emas, siyrat muhimligi ta’kidlanadi.

«Ы» operatsiyasi yoki Shurikning boshqa sarguzashtlari

Qadrdon filmni eslaganda mashhur komik aktyorlardan iborat sevimli uchlik darhol ko‘z o‘ngimizga keladi. Leonid Gayday 1965-yili ishlagan kartina o‘sha yiliyoq 69 million muxlis olqishiga sazovor bo‘lgan. Mana, ellik yildirki, yuz millionlab insonlar uchun hamon suyumli. Yangi yil arafasida yuz bergan voqealar, soxta o‘g‘irlikka tushgan uch qahramonga Shurik to‘sqinlik qilishi... film syujetini aytmasak ham, o‘zingiz bilasiz.

“Ta’tillar almashganda”

2006-yili romantik melodrama janrida ishlangan kartinada mashhur aktrisa va aktyorlar Kemeron Diaz, Keyt Uinslet, Jek Blek, Jud Lou ishtirok etgan. Voqealar Angliya va Kaliforniyada bo‘lib o‘tadi. Ayris va Amanda ismli qizlar Yangi yil arafasida o‘z uylarini almashtirib, bir muddat begona joyda yashab ko‘rmoqchi bo‘ladilar. Bu tajriba ularning shaxsiy hayotiga katta ta’sir ko‘rsatadi.

Nodirabegim IBROHIMOVA

tayyorladi.