Milliy maʼnaviyatning asosi milliy til dedik. Shu masalada yana bir gap. Keyingi paytlarda ijtimoiy tarmoqlarda “maʼnaviyat shaxsiy masala, unga davlat ham, boshqalar ham aralashmasligi kerak” degan maʼnodagi chaqiriqlar paydo boʻlyapti...

Xalqimizda el tushunchasi juda aziz tushuncha. El xudbinlikni, individualizmni, yakka shumshuklikni yomon koʻradi. Maʼnaviyat shaxsiy masala emas. U osmondan tushganday yo yerdan chiqqanday bir odamning ichida toʻsatdan paydo boʻlib qolmaydi. Odam doʻkonda sotiladigan qoʻgʻirchoq emas-ku. Ota-ona, bobo-momo degan gaplar bor. Men oʻz ichimdagi maʼnaviyatning 55 foizini ota-onam, bobom va momomdan olganman desam, toʻgʻri boʻladi. Qolgan 45 foizi koʻrib-kechirganlarim va oʻqiganlarimning tuhfasi. Mening maʼnaviyatim mening maʼnomdir. Bu maʼnoni faqat oʻzim tiklaganman desam, yolgʻonchilik va xudbinlik boʻladi. Aytganimday, bobom, momom, otam, onam, qadrdon maktabim, universitetim, elim, ona yerim… Maʼnaviyat elga taalluqli. Maʼnaviyatli odamlarning birlashuvidan el paydo boʻladi. Yanayam aniqrogʻi, odamlar maʼnaviyatni emas, maʼnaviyat odamlarni birlashtiradi, xuddi Ona Til kabi. Maʼnaviyatsiz odamlar birlashsa, poda paydo boʻladi. Milliy til mahv etilgan joyda maʼnaviyatsizlik zaharli qoʻziqorinlarday potirlab gullaydi. Chunki, unda el yoʻqoladi. Bunday falokatdan har bir xalqni Xudoning oʻzi asrasin!

Eshqobil SHUKUR,

“Ona tilimizning abadiyati nima bilan kafolatlanadi?” maqolasidan