Radioning mamlakatimizga kirib kelishi XX asrning 20-yillariga to‘g‘ri keladi. 1926-yilda O‘zbekistonda radiostansiya qurish uchun tayyorgarlik ishlari boshlanadi. Toshkent radio eshittirish stansiyasida 1927-yilning 4-fevral kuni sinov jarayoni muvaffaqiyatli amalga oshiriladi. Shu yilning 11-fevralidan O‘zbekistonda muntazam radio eshittirishlar yo‘lga qo‘yiladi. Tez orada Samarqand, Namangan, Urganch va Nukus shaharlarida ham radiostansiyalar ishga tushiriladi.

Radiokanallarimiz ichida eng yoshi ulug‘i “O‘zbekiston radiosi” hisoblanadi. Mamlakatimizda radio tashkil etilgan yillardagi birinchi diktor Nazirjon Kamolovdir. Fotima Yunusova esa “O‘zbekiston radiosi”dagi birinchi suxandon ayol bo‘lgan.

1934-yilning oxiriga kelib mamlakat aholisi radio orqali 7 yarim soat kundalik dasturlarni tinglash imkoniga ega bo‘lgan. Ular orasida xabarlar, kuy-qo‘shiqlar, adabiy-ma’rifiy dasturlar va bolalarga bag‘ishlangan radioeshittirishlar bor edi.

Ikkinchi jahon urushi boshlanishi bilan radioning vazifasi ham tubdan o‘zgardi. Endi u frontdagi voqea-hodisalarni ham ommaga yetkazishga xizmat qila boshladi. Shu bilan birga front ortida bajarilayotgan dolzarb ishlar ham radio orqali efirga uzatilgan. Qo‘lga kiritilgan g‘alabada ham bu qurilmaning hissasi katta bo‘ldi.

Urushdan keyingi davrlarda O‘zbekistonda to‘liq radiolashtirish harakati olib borildi. 1959-yilga kelib radioefirlar hajmi 12 soatga yetkazildi. 1966-yilning kuzida O‘zbekiston radiosining yangi binosi bunyod etildi. 1967-yilda Respublika radio eshittirish va ovoz yozish uyi tashkil etilgan. 1982-yilda qurilgan yangi binoda esa dramatik eshittirishlar va radiospektakllarni yozib olish imkoniyati yaratilgan. Bugun yurtimizda 40 dan ziyod davlat va nodavlat radiokanallar faoliyat yuritmoqda. Ular orqali vatandoshlarimiz dunyoda sodir bo‘layotgan voqea-hodisalardan tezda xabar topishmoqda. Shu bilan birga ijtimoiy, iqtisodiy, siyosiy tahlillar, ma’naviy-ma’rifiy dasturlar muntazam efirga uzatilmoqda.

Anvar ESHNAZAROV,

“O‘zbekiston tarixi” telekanali muharriri