To‘rimdan ko‘ra go‘rim yaqinligini anglab turibman. Qo‘liga bir quti konfet berilgan bolaga o‘xshab qoldim: konfetlar miqdori ozaygani sari ishtaha ochilib boradi, judayam kam qolganida esa o‘zgacha lazzat bilan yeyishni boshlaydi.

Ijtimoiy qonuniyatlar haqida va’z aytishga vaqtim yo‘q – hech narsa o‘zgarmasligini bilaman. Yoshiga yarashiqsiz qiliqlar qiladigan ahmoqlar bilan bahslashish istagim ham yo‘q. Siyqalik bilan kurashishga-da vaqtim qolmagan. Odamlarni manipulatsiya qiladigan va xudbinlik parvarishlanadigan turli mashvarat-majlislarga toqatim yo‘q – bunday joylarga borishdan tiyilaman.

Eng iste’dodli insonlarning mansabi, iqtidori va yutuqlariga ega chiqish uchun ularni badnom etishga urinadigan kaslar meni tashvishga soladi. Ommaviy axborot vositalaridagi sarlavhalarni muhokama qilishga vaqtim juda oz – qalbim shoshmoqda. Qutida judayam oz konfet qolgan.

O‘z xatolari ustidan kulishga qodir, hayotda muvaffaqiyat qozongan, o‘z burchini anglab yetgan va mas’uliyatni bo‘yniga olishdan qochmaydigan muruvvatli insonlargina meni qiziqtiradi. Yana inson qadr-qimmatini himoya qila oladigan va haqiqat, adolat, taqvodorlik tarafida tura biladigan odamlardan zavqlanaman. Ana shunday odamlar uchun yashasang arziydi.

Taqdir zarbalariga bardosh berib yana oyoqqa turgan va qalbida mehrni asrab qola bilgan hamda boshqalar qalbini to‘lqinlantira oladigan odamlar atrofimda bo‘lsa deyman.

Faqat yetuklik va raso aql tuhfa etishi mumkin bo‘lgan shiddat, g‘ayrat bilan yashashga shoshilaman, ha, men shoshilishim kerak. Bisotimda qolgan barcha konfetlarni yeyman, chunki umrim shomida qutida qolgan konfetlar shu paytgacha yegan konfetlarimga qaraganda yanada mazaliroq tuyuladi. Maqsadim – o‘zligim bilan, yaqinlarim bilan va vijdonim bilan uyg‘unlikda oxirgi manzilga yetib borish. Ikkita hayotim bor deb o‘ylar ekanman, ammo u yagona ekan va uni munosib yashashim kerak.

Entoni XOPKINS,

aktyor va kinorejissyor

Rus tilidan Jaloliddin Safoyev tarjimasi.