Hashar – muayyan yumushni ixtiyoriy, xolisona koʻpchilik, jamoa boʻlib bajarish. Hashar oʻzbek xalqining azaliy urf-odatlaridan boʻlib, jamoaviylikni oʻzida toʻliq aks ettiradi. Hashar hayotiy muammolarni birgalikda hal etish usuli, jamoa hayotiga oid moddiy-maishiy va maʼnaviy mazmundagi umumiy faoliyatdir. Hasharda oʻzbek oilalari birgalashib bir-biriga begʻaraz yordam koʻrsatadi, inshoot va binolar tiklaydi, nochorlarga yordam uyushtiradi. Mahalla, qishloq, jamoa hududlariga oid muammolarni hal qilishda ham, atrof-muhit tozaligi, obodonlashtirishga doir ishlarda ham hashardan foydalanilgan. Xalqimizga xos bu qadimiy udum bugungi kunda ham oʻz ahamiyatini yoʻqotmasdan kelmoqda.