Gʻurur – insonda, uning atrofida, millati, xalqi va davlatida qadr-qimmat, nomus, izzat-nafs kabi fazilatlar mavjud boʻlishi yoki amal qilishi natijasida uning oʻzini-oʻzi hurmat qilish hissini anglatadigan maʼnaviy tushuncha. Gʻururli inson oʻz shaxsini kamsitishga yoʻl qoʻymaydi, gʻururini yoʻqotmaslik yoʻlida u har qanday qiyinchiliklardan, jazolanishdan choʻchimaydi. Gʻurur insonning yuksak maʼnaviyat egasi ekanidan dalolat beradi. Gʻurur ayni paytda nafaqat insonning oʻzi bilan, balki oʻzi mansub boʻlgan jins yoki etnik kelib chiqishi bilan faxrlanish hissini ham anglatadi. Masalan, yigitlik gʻururi, qizlik gʻururi, milliy gʻurur Lekin gʻurur meʼyorida boʻlishi, yaʼni kishining asl qadr-qimmatiga mos kelishi lozim. Gʻururdagi meʼyorning buzilishi kishining kibrga berilishiga olib keladi: u oʻzi va boshqaning qadr-qimmati toʻgʻrisida notoʻgʻri tasavvurga ega boʻlgani uchun kibr-havo, manmanlikka beriladi. Kibrli kishi oʻzini boshqalardan ustun deb bilsada, aslida u oʻz qadr-qimmatining oʻzgalarnikidan past ekani tufayli uni sunʼiy ravishda koʻtarishga harakat qiladi, maʼnaviy boʻshliqni boshqalarga past nazar bilan qarash orqali toʻldirishga intiladi, bu yoʻlda yolgʻon va maqtanchoqlikdan tonmaydi. Pirovard natijada, u atrofdagilardan ajralib qoladi, oʻzgalarning nafratiga duchor boʻladi, oʻzligidan mahrum boʻlgan axloqsiz kimsaga aylanadi. Odatda davlatning qanchalik tez rivojlanishi, bu borada odamlarga kuch-quvvat baxsh etish, mamlakatning dunyo hamjamiyatida munosib oʻrin egallashi, avvalambor, xalqning maʼnaviy saviyasi, gʻururi va faxri nechogʻlik yuksak boʻlishiga bogʻliqdir. Har bir fuqaroda mana shunday tuygʻularni shakllantirish milliy gʻururning shakllanishiga xizmat qiladi. Ajdodlarimiz oʻz nasllarini umumbashariy tuygʻular, oʻlmas Sharq falsafasi, milliy qadriyatlarimiz ruhida tarbiya qilib kelganlar. Ota-bobolarimiz asrlar davomida tilimiz, dilimiz va dinimizni, oʻzbekning oʻzligini har tomonlama asrab-avaylab, barkamol avlodlarni voyaga yetkazganlar. Bunday fazilatlar mohiyat-eʼtibori bilan bizning zahmatkash xalqimizga munosibdir va bu bilan har qancha faxrlansak arziydi. Shu bilan birga, ulugʻ ajdodlarimizning tavallud sanalari faqat oʻzbek xalqi uchungina emas, balki butun Markaziy Osiyo mintaqasidagi xalqlar uchun ham madaniy va tarixiy ahamiyatga molik ekanini nazarda tutishimiz maqsadga muvofiq. Bunday tadbirlar kelajak avlodni tarbiyalashda ham ulkan ahamiyat kasb etadi. Biz bunday marosimlarni oʻtkazish orqali yoshlarimizni yangi qadriyatlar asosida tarbiyalaymiz, ularning qalbiga tarixiy oʻtmishga hurmat bilan yondashish, ularni avaylab-asrash, shu xalqqa mansubligi bilan faxrlanish tuygʻularini singdiramiz.