Sharqona axloq – Sharq xalqlari tomonidan insonning insonga, tabiat, din va dunyo, moddiy va madaniy neʼmatlarga, ruhiy va jismoniy hissiyotlarga munosabatida maʼlum tartibga solingan meʼyorlarni ifodalovchi tushuncha. Xulq-atvor, yurish-turish, tarbiya, xushaxloqlik, boadablik, ota-onaga, ustozlarga hurmat-ehtirom, xushmuomalalik, ochiq yuzlilik, vazminlik, kamtarlik, vaʼdaga vafodorlik, toʻgʻrisoʻzlik va shu kabi maʼnaviy tushunchalarning Sharqning turli-tuman xalqlari madaniyatida yaqqol koʻzga tashlanib turishi Gʻarb dunyosida Sharqona axloq tushunchasining shakllanishiga olib kelgan. Shuningdek, Sharq xalqlari tarixini turli tomondan oʻrganuvchi mutaxassislar ham Sharqda axloq masalasiga qadimdan juda katta eʼtibor qaratilgani va asrlar mobaynida bu sohada erishilgan natijalar butun insoniyat taraqqiyotiga katta hissa qoʻshganini taʼkidlaydilar.