Shariat (arabcha ostona va suv ichish joyi; yoʻl; musulmon olamida qonunchilik) – islomda Alloh joriy qilgan amaliy hukmlar majmuasi, shunga asosan, shariat fiqh maʼnosida ham tushuniladi. Samoviy dinlarning barchasidagi amaliy qism shariat deb ataladi. Islom shariati hukmlari Qurʼon, sunnat, ijmoʼ va qiyosdan olinadi. Islom shariatining maqsadlari din, jon, aql, nasl va molni asrashdan iborat. Shariatda ushbu narsalarni muhofaza qilish uchun zarur boʻlgan barcha choralar koʻrilgan. Shariatning hojatlilik maqsadlari esa, kishilarga qulaylik tugʻdirish hamda ulardan qiyinchilik va mashaqqatni aritishga qaratilgan. Paygʻambar Muhammad (s.a.v.) rahbarligida birinchi Islom davlati tashkil topganda shariat meʼyorlari oʻsha davlatning asosiy qonunlari boʻlgan va jamiyat hayotining barcha jabhalarini qamrab olgan. Keyinchalik 4 xalifa, ummaviylar, abbosiylar va usmoniylar davlatlari vaqtida ham shariat davlatning qonuni boʻlib kelgan. Ammo vaqt oʻtishi bilan turli omillarga koʻra, musulmonlar shariat hukmlaridan uzoqlasha borganlar. Hozirga kelib faqat Saudiya Arabistoni davlati oʻz shariatiga amal qiladi. Boshqa islom davlatlarida oilaviy nikoh, taloq, nafaqa kabi masalalarda va meros xususida shariatga toʻliq yoki qisman amal qilinadi.