SHUHRAT

Har bir odamda bolaligi yashiringan. U ayrim hollarda mo‘ralab, o‘zini oshkor qilib qo‘yadi.

* * *

Yolg‘izlik yo dono, yoki devonani yaratadi.

* * *

Ter to‘kib halollik bilan qo‘lga kiritilgan yutuq doim hasad tug‘diradi.

* * *

Inqilob – muhojirlarni, zulm qochqinlarni ko‘paytiradi.

* * *

Ko‘pincha astar avradan qimmat tuyuladi.

* * *

Qo‘rqoq faqat xiyonat qilishdan qo‘rqmaydi.

* * *

Yomon do‘st soyaga o‘xshaydi – quyoshli kunda qochib qutulolmaysan, bulutli kunda qidirib topolmaysan.

***

Uning muhabbati kech bahorda yoqqan qorga o‘xshaydi. Bir yoqdan yog‘sa, bir yoqdan erib ketadi.

* * *

Tarbiya taqani to‘g‘rilaydi.

* * *

Mashq bilan boyitib turilmagan ilm teshik chelakdan to‘kilgan suvdek ado bo‘ladi.

* * *

Qidirsangiz, yo‘qolgan oltinni topasiz, lekin yo‘qotilgan vaqtni topolmaysiz.

* * *

Mehribonlik – muhabbatning elchisi.

* * *

O‘zi yonmagan shoir birovni yondirolmaydi!

* * *

So‘z – fikr surati.

* * *

Zamon har bir zulmning intiqomini ham olib keladi.

* * *

Taqdir sinovi har kimning darajasiga qarab beriladi.

* * *

Oqni qoralash uchun ko‘p bo‘yoq kerak emas.

* * *

Nodon sudyadan xavfliroq odam yo‘q.

* * *

Tik o‘sgan daraxtdan qiyshiq soya tushmaydi. Haq so‘z pardozga muhtoj emas.

* * *

Yozganda gapni o‘rgimchak uyasidek to‘qimaslik kerak.

* * *

Yaxshi so‘z yong‘oqqa o‘xshaydi. Ma’nosini anglash uchun uni chaqib ko‘rmoq kerak.

* * *

Tikan bo‘lib oyoqqa kirguncha, gul bo‘lib yoqaga sanchil!

* * *

Har bir ko‘krakda yurak bor. Biroq har birining kaliti o‘zga.

* * *

Erkka kurash bilan erishiladi.

* * *

Inson qahramonlik ko‘rsatolmasa ham, unga doim tayyor turmog‘i shart.

* * *

Uzun til umrni qisqartiradi.

* * *

Tabiat xasis, hammaga ham shoirlik iste’dodini ravo ko‘rmaydi.

* * *

Tanqid – adabiyotning shikoyat daftarchasi.

* * *

Baxtning oyog‘i yo‘q – o‘zi kelmaydi, unga mehnat yetkazadi.

* * *

Chiroyli qo‘llar ham jallod boltasini tutishi mumkin. Men yoshligimning 15-20 yilidan voz kechib, keksalikka sakrab o‘tishga roziman. Lekin yonimda u, ugina bo‘lsa, qo‘sha qarisak...

* * *

Toqqa chiqishga erinmang, balanddan olis-olislar ko‘rinadi.

* * *

Shoir qalbdagi shivirni dovulga aylantiradi.

* * *

Sababsiz kechirim so‘ratmoq – gunoh.

* * *

Aql tishi hammada bor, ammo...

* * *

Umr yong‘oqdek yumalab o‘tadi-ketadi.

* * *

Eng yomon qafas – to‘rt tomoni ochiq qafasdir.

* * *

Ertangi kun qayg‘uga sabab bo‘ladigan bugungi shodlikning ma’nisi yo‘q.

* * *

Sevgisiz nikoh – hidi yo‘q gul.

* * *

Do‘stlik zaiflashgan davrada takalluf tomir otadi.

* * *

Gul hidlagan odamga atrini yuqtiradi.

* * *

– Nega boshingizni egib o‘tiribsiz, buvi?

– Yer chaqiryapti shekilli, bolam.

“Tafakkur” jurnali, 2019-yil 3-son.

“To‘rt tomoni ochiq qafas”