Farzand (forscha bola, oʻgʻil, qiz, nasl) – ota-onaning oʻzlaridan keyin qoldiradigan zurriyodi. Farzand oila quvonchi, hayotning, ajdodlar moddiy-maʼnaviy hayotining davomiyligini taʼminlovchi vositadir. Maʼnaviy jihatdan kimning bolasi boʻlishidan qatʼi nazar, yosh jihatdan ulugʻ insonlar – ajdodlar, yosh jihatdan kichik insonlar – avlodlarga nisbatan qoʻllanadigan tushuncha. Farzand tushunchasi, shuningdek, inson tomonidan amalga oshirilgan ishlarning ulugʻligini ifodalash va unda inson mehnatining oʻrnini koʻrsatish maʼnosida ham ishlatiladi va bu mehnatning xalq, millat, tamaddun, koinot, yer sayyorasiga tegishliligini ham ifodalaydi. Masalan, “Yer farzandi”, “xalq (millat) farzandi”, “Koinot farzandi” va hokazo. Jumladan, millatimiz, xalqimiz ichidan yetishib chiqqan juda koʻp insonlar dunyo xalqlari tomonidan ana shunday atama bilan tilga olinadi. Ayni vaqtda atama oʻzidan kichikka nisbatan izzat, umuminsoniy maʼnoda esa chuqur hurmat maʼnolarini anglatuvchi tushunchadir.