Fan (arabcha ilm, bilim, mahorat) – dunyo haqidagi obyektiv bilimlar tizimi; uni maʼlum maqsadlar yoʻlida oʻzgartirishga xizmat qiladigan tabiat va jamiyat hayotini aks ettiruvchi ijtimoiy ong shakli. Jamiyatning ijtimoiy institutlaridan biri boʻlgan fan qadriyatlar tizimida oʻziga xos oʻringa ega. U katta ilmiy salohiyatni, ijodiy kuch-quvvatni birlashtiradi, millat dunyoqarashini shakllantiradi, taʼlim-tarbiya, axloq meʼyorlarini vujudga keltiradi, maʼnaviy barkamol insonni tarbiyalaydi, mamlakatda qudratli ilmiy salohiyatni yaratishga xizmat qiladi. Shuning uchun Oʻzbekiston ziyolilari fan va texnikani, tarixiy merosimizni chuqur oʻrganib, dolzarb mavzularda tadqiqotlar olib bormoqdalar, masalan, tabiiy va ijtimoiy jarayonlarni matematik modellash, informatika va hisoblash texnikasi, ehti mollar nazariyasi, geologik jarayonlarning qonuniyatlarini oʻrganish, molekulyar-genetik, gen-hujayra sohasidagi, tibbiyot, qishloq xoʻjaligi, energiyaning noanʼanaviy turlarini yaratish, quyosh energiyasini kompleks va samarali suratda boshqa turdagi energiyaga aylantirish va boshqa Oʻzbekistonda mustaqillik yillarida fan sohasidagi islohotlarga katta ahamiyat berilmoqda. Masalan, 2002-yilda Respublika fan va texnika davlat qoʻmitasining Oʻzbekiston fan va texnologiyalar markaziga aylantirilishi, 2006-yilda esa bu sohada yana bir tizimli oʻzgarishning amalga oshirilishi kabilar shular jumlasidandir.