Umuminsoniylik – inson, jamiyat, davlat va boshqalar uchun umumiylik kasb etuvchi hayot mezonlari, taraqqiyot tamoyillari va qonuniyatlari, umumiy qoida va tartiblarni ifodalovchi tushuncha. Mazkur tushuncha hayotning turli jihatlari, xilma-xil ijtimoiy sifat va xususiyatlarning umuminsoniy xarakterga ega ekanini anglatadi. Bu tushuncha turli sohalarda namoyon boʻladigan xalqaro andozalar, butun jahon ahamiyatiga molik jarayonlar, dunyoning barcha hududlariga xos voqea-hodisalarga nisbatan ham qoʻllanadi. Bir soʻz bilan aytganda, “Umuminsoniylik” odamlar uchun umumiy boʻlgan mezonlar, obyektiv holatlar, xususiyatlar, shart-sharoitlar va boshqalarni oʻzida aks ettiradigan tushuncha sifatida ishlatiladi. Umuminsoniylik odamzodning yashashi, umrguzaronligi, amaliy faoliyati, insoniyat hayotining eng umumiy sohalariga tegishli boʻlgan maʼnaviy tamoyillar, talab va hodisalar bashariyatning oʻtmishi, buguni va kelajagini, yashashning yoʻnalishlari, qonun-qoidalari, talab va tartiblarini, odamlarning eng azaliy orzu-umidlari va ideallarini oʻzida aks ettiradi. Umuminsoniylik jamiyat aʼzolarining barchasi uchun umumiy ahamiyat kasb etadi, insoniyat hayotida roʻy berayotgan oʻzgarishlar, kishilarning amaliy faoliyati, yashash tarzi, boshqalarga munosabati ham ushbu mezonga mos kelishi yoki mos kelmasligiga qarab baholanadi. Mamlakatimiz taraqqiyotining hozirgi davrida umuminsoniylik jamiyat va davlat qurilishini isloh qilish, hayotning barcha sohalarida tub oʻzgarishlarni amalga oshirishning eng asosiy tamoyili sifatida namoyon boʻlmoqda.