Sizda immunitet qay darajada ekanligini kasallikning davom etish muddati yoxud jarohatning bitishiga qarab aniqlash mumkin. Jarohat tez bitsa, tumov tez chekinsa, demak, organizmingizda immunitetlilik darajasi yuqori. Lekin xastalik asoratli bo‘lsa, jarohat sekin bitsa-chi? Unda siz immunitetni ko‘tarish uchun harakat qilishingizga to‘g‘ri keladi.

Nega immunitet pasayadi?

1. Tez-tez takrorlanib turadigan  ruhiy zarbalar (stress);

2. Organizmda to‘planib qolgan, biologik faol minerallar va vitaminlarning kamayib ketishiga sabab bo‘ladigan ovqat chiqindilari;

3. Antibiotiklarni keng qo‘llash;

4. Atrof-muhitdagi zararli kimyoviy moddalarning ko‘pligi;

5. Dori-darmonlardan noto‘g‘ri foydalanish;

6. Og‘ir jarohatlar va jarrohlik operasiyalari hayot jarayonida yuzaga keladigan immunodefisit holatiga sabab bo‘ladi.

Vitaminlar manbaasi

Tarkibida A vitamini bo‘lgan mahsulotlar immunitetni ko‘tarish xususiyatiga ega. A vitaminining organizmdagi asosiy vazifasi immun tizimini boshqarish va ko‘rish qobiliyatini me’yorlashtirishdan iborat. Asosan, baliq mahsulotlari A vitamini bilan to‘yingan bo‘lib, bolalar organizmi uchun foydasi katta. Tuxum, jigar va sut mahsulotlarida ham A vitamini mavjud.

Gripp va o‘tkir respirator virusli infeksiyalar yuqqanda vitaminga boy mahsulotlardan iste’mol qilish ularning tezda bartaraf etilishiga olib keladi. Na’matak tarkibida vitaminlar juda ko‘p. 

Uy sharoitida

Immunitetni ko‘tarish asli kasallikning oldini olishdir. Buning uchun har kuni nahorga 1-2 dona qizil sabzi, 2 dona apelsin yoki olma, tushlik paytida yarim bog‘ selder yoki kashnich, salat bargi, yotishdan oldin 1 piyola qatiq iste’mol qilish foydaliroq. Petrushka, selder, shivit, salat bargi tanaga quvvat beruvchi, yuqumli kasalliklardan himoyalovchi ta’sirga ega.

Immunitetni ko‘tarishda hamda asab tizimini mustahkamlashda asalga teng keladigani yo‘q. Yotishdan oldin 1 oshqoshiq asal yeb, ortidan qaynatilgan iliq suv ichiladi. Yoki sedanani yanchib, asalga aralashtiriladi va har kuni nahorga no‘xatday miqdordagisi iste’mol qilinadi.

Foydali mashg‘ulotlar:

*Hammomga borish

*Sayr qilish

*Qiziqarli va quvnok kitob o‘qish

*Kino, teatr va konsertga borish

*Sport bilan shug‘ullanish

*Do‘stlar bilan suhbatlashish

*Meva va sabzavotlarni iste’mol qilish

*Chiniqtiruvchi muolajalarni boshlash

*Bo‘shashtiruvchi mashqlar bajarish

*Sizni qiziqtiruvchi xobbingizga vaqt ajratish.

Har qanday foydali va yoqimli muolajalar yaxshidir. Ularning barchasi immunitetni ko‘taradi. Xursandchilik butun organizmning ishini yaxshilab, immunitetni mustahkamlanishiga yordam beradi. Chekish va alkogoldan yiroq bo‘ling. Ular immunitetni keskin pasaytiradi.