Tekinxoʻrlik – mehnat qilmay yeb-ichish, kun koʻrish, tanballik, birovlarning hisobiga hayot kechirishni anglatuvchi maʼnaviy illat. Tekinxoʻrlik “ishyoqmaslik”, “dangasalik” soʻzlariga maʼnodosh, salbiy maʼnoga ega boʻlgan tushuncha hisoblanadi. Inson hech qanday mehnat qilmasdan, birovlarning hisobiga yashab, kun koʻrsa, bu uning xudbinligi alomatidir. Xalqimizda toʻrt muchasi sogʻ odam kimningdir yordamiga muhtoj boʻlsa, kimningdir soyasi ostida undan umidvor boʻlib yashasa, “uyat” ish, yaʼni tekinxoʻrlik deb hisoblanadi. Chunki sogʻlom inson oʻzi mehnat qilishi va oʻz rizqini oʻzi terib yeyishi zarur. Tekinxoʻrlik va qorin gʻamida tobe hamda mute boʻlib yashash xoru zorlikka olib keladi.