Siyosiy va madaniy ekstremizm – siyosiy hamda maʼnaviy jihatdan mutlaqo salbiy hodisa boʻlib, asosiy maqsadi siyosat hamda maʼnaviyat bagʻrida mavjud beqiyos keng imkoniyatlardan oʻz vayronkor gʻoya va rejalarini amalga oshirish uchun intilishda namoyon boʻladi. Ijtimoiy hayotning barcha jabhalariga ekstremizmning oʻz tarafdorlari orqali kirib borish ehtimoli kuchli. Bu, bir tomondan, dunyo ahlining hanuzgacha ekstremizm haqida aniq tushunchaga ega emasligi, ikkinchi tomondan, aqlzakovatga zid yoʻl bilan hokimiyatga intiluvchi unsurlar mavjudligiga borib taqaladi. Hozirgi murakkab davrda ekstremizmning inson barhayotligi tayanchlari boʻlmish siyosat va maʼnaviyatga kirib borishi salbiy oqibatlarni keltirib chiqarishi, hattoki, afgor omma koʻz oʻngida siyosat va maʼnaviyatga putur yetkazishi mumkin. U siyosatda aqidaparastlik, siyosiy radikalizm, irqchilik, shovinizm, militarizm, global hukmronlikka daʼvo qilish va ayniqsa, “demokratiya eksporti” va boshqa koʻrinishlarda namoyon boʻlsa, maʼnaviyatda uning mohiyatiga yot aqidaparastlik, “ommaviy madaniyat”, vatangadolik kabi turli maʼnaviy buzuqliklarda namoyon boʻlishi mumkin. Dunyoning bugungi holatiga siyosat va maʼnaviyat nomidan ish yurituvchilarning taʼsiri haqida soʻz yuritilar ekan, bir paytlar siyosiy ekstremizmning tarixiy koʻrinishlaridan boʻlgan natsizm, fashizm va totalitar kommunizmning insoniyatni qay holatga tushirganligini eslash kifoya. Bugungi kunda esa siyosiy va madaniy ekstremizm maʼnaviy yuksalishning ulkan marralaridan hisoblangan jahon dinlaridan (buddizm, xristianlik va islom) ekstremistlarning makkorona foydalanishga intilishida ham yaqqol koʻzga tashlanmoqda. Siyosiy va maʼnaviy jabhada sodir boʻlayotgan ekstre mistik xurujlardan har bir davlat va dunyo hamjamiyati jiddiy talafot koʻrmoqda. Siyosiy va madaniy ekstremizm bugungi qaltis vaziyatda insonlar, guruhlar, elatlar, davlatlar va nihoyat madaniyatlar oʻrtasiga keskin dushmanlik urugʻini sochib, hech qanday muloqot, murosaga oʻrin qoldirmaydi, ularni oʻzaro qirgʻinbarotga undaydi. Bugungi kunda uning oldini olish, unga qarshi kurashish vazifasi dolzarblashib bormoqda.