Salohiyat – isteʼdodning bir turi boʻlib, insonning muayyan tarzda oʻz ilhomini qabul qilishga tayyorlangandan soʻng yuz beradigan sifat. Yuksak aql, isteʼdod egalari salohiyatli kishilar deyiladi. Salohiyat soʻzi kishi yoki millatning ichki imkoniyatlari, toʻla namoyon boʻlmagan kuch-quvvati maʼnosida ham ishlatiladi. Masalan, milliy salohiyat – millat, xalq, mamlakat, jamiyat kuch-quvvati, uning mavjud ichki, botiniy, vaqti soati kelganda namoyon boʻladigan iqtisodiy, ilmiy, madaniy, maʼnaviy va boshqa imkoniyatlaridir. Milliy salohiyat obyektiv va subyektiv omillarga bogʻliq boʻladi. Obyektiv omillar: millat yashayotgan hududning koʻlami va hayot kechirishga qulayligi, tabiiy shart-sharoitlar, yer usti va yer osti boyliklarining mavjudligi, aholining soni, hayvonot va oʻsimlik olamining xilma-xilligi, suv manbalarining serobligi, quyoshli kunlarning koʻpligi va hokazo. Subyektiv omillar: aholining savodxonlik darajasi, xalqning qoʻshni davlatlar bilan manfaatli munosabatlar oʻrnata olishi, mamlakat ichidagi barcha millatlar, dinlar, ijtimoiy sinflar va boshqa tabaqa vakillarining hamjihatligi. Obyektiv omillar mavjud boʻlsada, lekin xalq tarqoq, uyushmagan boʻlsa, mamlakat, davlat qoloqligicha qolaveradi. Aksincha, subyektiv omillar tabiiy sharoit noqulay boʻlsa, natija bermaydi. Hozirgi zamon rivojlangan davlatlari va millatlari shuning uchun yuksak natijalarga erishganlarki, ularda obyektiv va subyektiv omillar uygʻunlashgan hamda ishchanlik, tashabbuskorlik, tadbirkorlik, topqirlik bilan ishga solingan, hayot surʼati doim yuqori. Ayni vaqtda, jamiyat taraqqiy etgan sari subyektiv omillarning ahamiyati ortib bormoqda. Rivojlangan davlatlar zamonaviy texnika yutuqlari va fan ixtirolariga suyangan holda Yer kurrasining tabiiy jihatdan noqulay qismlarida ham moʻjizakor ishlarni amalga oshirmoqdalar. Masalan, Shimoliy qutbda joylashgan Islandiyada yer ostidan chiqadigan qaynoq geyzer suvlardan foydalanish natijasida subtropik mevalar yetishtirilmoqda. Yoki oʻz yer osti boyliklariga ega boʻlmagan Yaponiya eng ilgʻor sanoat, texnika- texnologiya va amaliy fanni yuzaga keltirib, jahonda eng raqobatbardosh mahsulot ishlab chiqarmoqda. Bunday misollarni koʻplab keltirish mumkin. Mustaqillikka erishgach, Oʻzbekistonda tabiiy, iqtisodiy, ijtimoiy-siyosiy, maʼnaviy-madaniy hamda intellektual salohiyatga tayangan holda jamiyat va davlat hayotining barcha sohalarini tubdan isloh qilish, yurtimizda ozod va obod Vatan, erkin va farovon hayot barpo etish borasida ulkan yutuqlar qoʻlga kiritilmoqda.