Bir kuni kemada ketayotsak, ortimizdagi qayiq ag‘darilib, ikki odam girdobga tushib cho‘ka boshladi. Kemadagi badavlat kishi kemachiga “Cho‘kayotganlarni qutqarsang, yuz tillo beraman”, dedi. Kemachi rozi bo‘lib, cho‘kayotganlardan birini kemaga olib chiqdi. Ortiga qaytgunicha ikkinchisi cho‘kib ketdi. 

– Attang, umri qisqa ekan, – dedi badavlat odam.

– Ehtimol, gapingiz rostdir. Ammo bu ishning boshqa sababi ham bor. Omon qolgan odam bir kuni piyoda ketayotganimda meni tuyasiga mindirgan. Halok bo‘lgani esa yoshligimda qamchilab urgandi. Suvga tushganimda shu ishlar yodimga tushib, avval menga yaxshilik qilganini qutqarishga shoshildim. Ikkinchisiga, taqdiri ekan, ulgurmadim.

Allohning so‘zi rostdir. Kim yaxshilik qilsa ham, yomonlik qilsa ham o‘zi uchundir.     

Sa’diy Sheroziyning “Guliston”idan.