Minnatdorlik – bu qarz, turgan gapki, uni bolalar meros sifatida ota-onalaridan aslo bajonidil qabul qilib olmaydilar.

***

... siz kaminda yonayotgan oʻtinga qarab, olovda ayolning chehrasini koʻrasiz, men esa koʻmirni. Siz hamma narsaga ishonasiz, men boʻlsam hech narsaga ishonmayman.

***

Kimda-kim chor-nochor zamonasozlik qilgan boʻlsa, unga sizning har qanday odob-axloq qonun-qoidalaringiz va ishonch-eʼtiqodingiz uch pul.

***

Xulq-atvor xususiga kelsak, odam hamma yerda bir xil: hamma yerda kambagʻallar bilan boylar it-mushuk.

***

Faqat aqlsizlar-u kasal odamlargina surunkasiga baxtini sinab, bir necha tiyin yutish ilinjida qarta ustida behuda vaqtini oʻtkazishi mumkin.

***

Hayot – murakkab, ogʻir hunar, unga oʻrganish uchun tirishish kerak. Hayotni bilgan odam, uning ogʻusini totiganida yuragining pay tolasi chiniqadi, pishiq boʻladi, bu unga oʻz taʼsirchanligini idora qilishga imkon beradi.

***

Oʻlim toʻshagida jon talashib yotgan alamdiydani oʻrab olgan merosxoʻrlarning qalbiga nazar tashlashning iloji boʻlganida biz dahshatli manzarani koʻrgan boʻlardik.

***

Baxtsizlik ​​– eng yaxshi murabbiy.

***

Muhtojlik mehnatni vujudga keltiradi, mehnat bilimni yaratadi, bilimdan esa boylik yuzaga keladi.

***

“Men boʻlgʻusi dahoman” deb podadan oldin chang koʻtargan maqtanchoqlar ahmoqlar koʻzidagina oqil boʻlib koʻrinadilar, xolos.

***

Ishingiz baroridan kela boshlagach, jurʼatsizlik ham yoʻqoladi, tortinchoqlik, uyatchanlik esa, ehtimol, jurʼatsizlikning bir turidir.

***

Buyuk shoir bo‘lmoq uchun gapni chappa tuzish va zo‘r qofiya topishning o‘zi kifoya emas!

***

San’atning vazifasi tabiatdan nusxa ko‘chirish emas, balki uni ifodalay bilish.

***

Taassurot, taassurot deysan! Uqib ol, taassurot bu – hayotning o‘zi emas, undagi bir tasodif xolos!

***

Go‘zallik sipo va qaysar xilqat – osongina taslim bo‘lmaydi, uni bo‘ysundirish uchun qulay fursatni kutish, izma-iz ta’qib etish va g‘aflatda qoldirish darkor.

***

O, tabiat, tabiat! Sening lip etib ko‘rinib, so‘ng g‘oyib bo‘luvchi etagingdan tutish biror marta biron kishiga nasib etganmikan?

***

Musavvir qo‘lida mo‘yqalam bilangina xayolga berilishi kerak.

***

Go‘zallik va ayol faqat sevgilisi oldida yalang‘och holda namoyon bo‘la oladi.

***

Muhabbat – sir, u qalbning tub-tubidagina yashay oladi, erkak hatto do‘stiga ham mana, men sevgan ayol – shu, deya sirni ochsa, shu onning o‘zidayoq muhabbat o‘ladi, yo‘q bo‘ladi.

***

Muhabbat gullari foniy, san’at gullari esa abadiydir.

***

Axir tasviriy san’at ham tabiatning o‘zidek ko‘pgina unsurlardan tashkil topgan: rasm – o‘zak, kolorit esa – hayot, lekin o‘zaksiz hayot hayotsiz o‘zakka qaraganda notugaldir.

***

Muhtojlikda kishiga turfa tushlar baxsh etuvchi uyqu hamdard bo‘ladi.

***

Bu yerda birovning shafqatiga sazovor bo‘lish uchun o‘taketgan baxtsiz, birovning mehrini qozonish uchun esa juda zaif, birovning ko‘nglini eritish uchun juda g‘arib kishi bo‘lish kerak.

Shohrux USMONOV tayyorladi

Oyina.uz'ni Telegramda kuzating