Latifa (arabcha go‘zal, yoqimli; ko‘pligi latoyif – latiflar, go‘zal so‘z va hikoyalar) – xalqning nozik fahm bilan aytilgan kulguli kichik hikoyasi. Latifa ba’zan nodira, zarifa va ajiba deb ham yuritilgan. Latifa – xalq og‘zaki ijodining eng ommabop janrlaridan biri. Xalq latifalarining qahramoni Afandi (Nasriddin Afandi) bo‘lib, u o‘z donoligi, hozirjavobligi, tadbirkorligi, so‘zamolligi bilan salbiy xarakterdagi kishilarni mot qiladi. Latifa ko‘pincha Afandi deb ham yuritiladi. Afandi turli millatlarda, masalan, tojiklarda Mushfiqiy, turkmanlarda, qirg‘iz va qozoqlarda Aldarko‘sa deb nomlanadi. Zamonaviy latifalar yumoristik xarakterda bo‘lib, ularda byurokratlar, amalparastlar, boqibeg‘am kishilar yengil kulgu bilan tanqid qilinadi, eskicha aqidalar fosh etiladi.