Laganbardor – o‘z manfaati uchun biror-bir shaxs, asosan, mansabdor oldida o‘zini juda tuban tutib, unga xushomad qiladigan pastkash odam; xushomadgo‘y. Laganbardorlik shunday kishiga xos xislat, xatti-harakat, xushomadgo‘ylik. Laganbardorlik inson shaxsiyatini o‘ldiradigan, o‘zligidan mahrum etadigan illat. Laganbardor o‘z manfaati yo‘lida har qanday tubanlikka tayyor bo‘ladi. U mansabdorlarga yaxshi ko‘rinish va undan o‘zi istagan ne’matlarni qo‘lga kiritish uchun har qanday jirkanch ishdan qaytmaydi. Laganbardor uchun muqaddas narsaning o‘zi yo‘q. Do‘stlik, muhabbat, vafo, sadoqat tuyg‘ulari unga begona. Laganbardor hamma narsani pul bilan o‘lchaydi, atrofidagi odamlarga o‘z manfaatiga xizmat qilishi nuqtai nazaridan yondashadi. Mansabdorning soyasiga salom byerib, sadoqatini turli yo‘llar bilan namoyish etishga urinadi, ammo foydasi tegmay qolgan odamdan shu zahoti yuz o‘giradi.