Ko‘rgazma – moddiy va ma’naviy sohadagi faoliyat yutuqlarini namoyish etish vositasi. Ko‘rgazma orqali inson o‘z mehnati samarasini keng ommaga ko‘rsatish, namoyish qilish, tanishtirish va targ‘ib etishga harakat qiladi. Ko‘rgazmalar asosida katta mehnat, tajriba va izlanish yotadi. Unga ancha oldindan tayyorgarlik ko‘riladi. Eng sara ishlar (buyum, san’at asarlari va hokazolar) tayyorlanadi. Ko‘rgazma o‘tkazish vaqti oldindan belgilanib, eksponatlar tartib va did bilan joylashtirib chiqiladi.

Ko‘rgazmalar maqsadiga ko‘ra quyidagi turlarga bo‘linadi:

1) san’at ko‘rgazmalari: ularda tasviriy va amaliy san’at namunalari namoyish qilinadi. Ular asosan mualliflarning xalqqa ijodiy hisoboti tarzida o‘tkaziladi. San’at ko‘rgazmalari muallif hamda tomoshabinlarga katta ma’naviy oziq berib, estetik zavq bag‘ishlaydi.

2) savdo ko‘rgazmalari: o‘ziga xos reklama vazifasini bajaradi va tijorat maqsadida uyushtiriladi. Savdo ko‘rgazmalarida istalgan buyum va ashyolar (transport, sanoat, qishloq xo‘jaligi, qurilish mollari va hokazo) namoyish qilinishi mumkin.

3) ma’rifiy-targ‘ibiy (informatsion) ko‘rgazmalar: bu turdagi ko‘rgazmalarda ilm-fan va ishlab chiqarishdagi yutuqlar namoyish qilinadi. Ular xalqni fan-texnika sohasidagi eng so‘nggi yangiliklar bilan tanishtiradi.

Bundan tashqari, ko‘rgazmalar: davriy-muntazam (har yili, ikki, uch yilda bir marta va hokazo) va nomuntazam (yubileylar, kongresslar va hokazo); universal (fan, texnika va madaniyat sohalaridagi yutuqlar va mahsulotlar namoyishi) va ixtisoslashgan (bir yoki bir necha yondash tarmoqlarni qamrab oluvchi); milliy, mintaqaviy, xalqaro va hokazolarga bo‘linadi. Ko‘rgazma ma’lum bir maqsadga qaratilgan, xususan, olamni voqea-hodisalarni chuqur va har tomonlama idrok etishga, anglashga qaratilgan bo‘lishi lozim.