Ko‘ppartiyaviylik – 1) jamiyatda bir necha siyosiy partiyalarning mavjudligi; 2) jamiyatning erkinligi demokratlashuv va siyosiy xilma-xillik darajasining muhim ko‘rsatkichi. Mazkur tamoyil jamiyatda turli partiyalarning erkin faoliyati uchun ijtimoiy-huquqiy sharoit yaratishni ko‘zda tutadi. Bunday sharoitda partiyalar o‘z dastur va siyosatlarini Konstitutsiya asosida amalga oshirish imkoniyatiga ega bo‘ladi. Ko‘ppartiyaviylik demokratik jamiyat hayot tarzining ajralmas tarkibiy qismi hisoblanadi. Muayyan mamlakatdagi siyosiy erkinlik va inson huquqlarining ta’minlanganlik darajasi ham ana shu tamoyilga nisbatan aniqlanadi. O‘zbekiston mustaqillikka erishganidan keyin ko‘ppartiyaviylik tamoyilini amalga oshirish uchun yurtimizda keng imkoniyatlar yaratildi. O‘zbekiston Konstitutsiyasida, “Siyosiy partiyalar to‘g‘risida”gi Qonunda ko‘ppartiyaviylikning huquqiy asoslari o‘z aksini topgan. Mamlakatimizda bugungi kunda mavjud partiyalar ana shu asosda faoliyat yuritadi.