Konstitutsionalizm (lotincha constituo – o‘rnatish) – jamiyat hayotini qabul qilingan qoida va qonunlarga qat’iy rioya etgan holda tashkil etish va boshqarish jarayonini ifoda etuvchi tamoyil. Konstitutsionalizm g‘oyasi faqat jamiyatning qonuniy-huquqiy asoslariga tayanib qolmasdan, balki ijtimoiy, siyosiy, iqtisodiy, ma’naviy, axloqiy tamoyillarning uyg‘unligini ham ifoda etadi. Boshqacha aytganda, davlat tuzumi, uning tarkibiy tuzilishi, jamiyatdagi umumiy qonun-qoida va talablarning iqtisodiy rivojlanish jarayonlari, insonlarning ma’naviy kamoloti, yuksak axloqiyligi bilan uyg‘unlashgan holda mamlakatning Asosiy qonuni – Konstitutsiyasida aks etishi konstitutsionalizm g‘oyasining mohiyatini aks ettiradi. Bunda jamiyat a’zolarining konstitutsionalizmni, demokratik o‘zgartirishlarni amalga oshirishning tarixiy zaruratini anglabgina qolmay, balki uni chinakam erkinlik, mustaqillik va farovonlik asosi, deb bilishiga erishish muhim ahamiyatga ega. Bu g‘oyani amalga oshirish va uning samaradorligi jamiyat a’zolarining huquqiy madaniyat darajasiga bog‘liq. Chunki, qabul qilingan qonunlar soni emas, balki ularning hech bir istisnosiz ijro etilishi muhimdir. Shuning uchun ham, bir tomondan, konstitutsionalizm huquqiy madaniyatning namoyon bo‘lishi, ikkinchi tomondan, huquqiy madaniyat rivoji sifatida namoyon bo‘ladi. Haqiqiy konstitutsionalizm qonunlar ustuvorligi, inson huquq va erkinliklari darajasi, ijtimoiy-siyosiy kafolatlar xarakteri, ularning umuminsoniy tamoyillarga mosligi bilan belgilanadi. Chinakam demokratiyaga intilayotgan jamiyat o‘z xalqi manfaatlarini, ularning or-nomusi, qadr-qimmati va erkinliklarini konstitutsionalizm g‘oyalariga asosan muhofaza qilishga qodir bo‘lgan taqdirdagina kuchli, qudratli bo‘lgan davlatchilikning huquqiy asoslarini o‘rnatadi. Mustaqillik yillarida O‘zbekistonda konstitutsionalizm g‘oyasiga asoslangan davlat tuzumining demokratik tamoyillari shakllandi. 1992 yil 8 dekabrda O‘zbekiston Respublikasi Konstitutsiyasi qabul qilindi. Bozor munosabatlariga o‘tish, erkin demokratik jamiyat qurishning hozirgi bosqichida hayot talablariga javob beradigan huquqiy-me’yoriy hujjatlarni ishlab chiqish va qabul qilish mexanizmlari vujudga keldi.