Kompyuter madaniyati – odamning o‘z faoliyatida axborot texnologiyalari majmuidan tegishli tarzda foydalana olishi demakdir. Kompyuter (inglizcha to compute, computer – hisoblash, hisoblagich) – hisoblarni bajarish, shu jumladan elektron shakldagi axborotni oldindan belgilangan algoritm bo‘yicha qabul qilish, qayta ishlash, saqlash va ishlov berish uchun mo‘ljallangan texnik qurilma. Dastlab ingliz tilida bu so‘z mexanik qurilmani jalb qilib yoki uning ko‘magisiz arifmetik hisoblarni bajaradigan insonni anglatgan. Keyinchalik uning ma’nosi hisoblash mashinalariga ko‘chirildi. Bugungi kundagi zamonaviy kompyuterlar matematika bilan bevosita bog‘liq bo‘lmagan ko‘plab masalalarni ham bajaradi. XX asrning 90-yillaridan boshlab, kompyuter atamasi elektron hisoblash mashinalari (EHM) atamasini amalda siqib chiqardi. Axborotlashgan jamiyatda odamlar noaniqlik sharoitida, inqirozli vaziyatlarda muhim qarorlar qabul qilishiga to‘g‘ri keladi. Bu masala ajdodlar tajribasi kamlik qiladi. Odamlar vaziyatni mustaqil tahlil qilish, qabul qilinayotgan qarorlarning oqibatini oldindan ko‘rish qobiliyatiga ega bo‘lishi talab etiladi. Yuksak ijtimoiy va ishlab chiqarish madaniyatisiz kompyuter texnologiyalarining rivojlanishi mumkin emas, kompyuterlardan kundalik faoliyatda samarali va oqilona foydalanish esa kompyuter sohasida muayyan bilim va ko‘nikmalarga ega bo‘lishni taqozo etadi.