Ishonch – biror-bir shaxsga uning so‘zi, ishi va xatti-harakatlariga xayrixohlik va simpatiya bilan qarash, u bilan hamkorlik qilish, yaqin munosabat o‘rnatishga asos bo‘ladigan ma’naviy omil. Ishonch o‘zaro to‘g‘rilik, adolatlilik, insofu diyonat, halollik, samimiylik va iymonga asoslanadi. Kishilar o‘rtasidagi munosabatlar aniq ma’no-mazmun kasb etib borishi bilan ishonch mustahkamlanadi yoki aksincha buziladi. Insonga asossiz ravishda ishonmaslik ma’naviy saviyaning yetarli emasligi bilan bog‘liq. Ishonch: 1) nimagadir, qandaydir g‘oya yoki mafkurani to‘liq bilish, ularga mehr-muhabbat qo‘yishga qaratilgan qat’iy nuqtai nazar, ma’naviy intilish, e’tiqod asosi; 2) ma’naviy, madaniy, axloqiy, ijtimoiy, siyosiy va boshqa tamoyillar, me’yorlar, an’analar, qadriyatlarni ongli ravishda o‘zlashtirish yo‘li bilan tarbiyalanishning asosiy usullari, shaxsda e’tiqodni shakllantirish omili. Ishonch ba’zida inson harakatini oldindan belgilab, sababga aylanadi. Ishonchning shakllanishi turmush tarzi, tashqi muhitning insonga ta’siri, ijtimoiylashuv jarayonining qanchalik samarali ekani, har qaysi odamning ijtimoiy va amaliy faoliyatiga bog‘liq. Ishonch ijtimoiy hayotning barcha sohalardagi faoliyatning, inson hayotining asosiy sharti va mezoni hisoblanadi. U bo‘lmasa yashashning ma’nosi bo‘lmaydi.