Inqiroz (arabcha orqaga ketish, pasayish, tugash, oxir bo‘lish, bitish) – ma’lum bir voqelikning tabiat va jamiyat taraqqiyotining obyektiv qonuniyatlariga zid kelib qolishi, muayyan jarayonlarning vaqt o‘tishi bilan yangicha talablarga javob bera olmasligi tufayli yuz beradigan tanglik holatini anglatadigan tushuncha. U jamiyat hayoti, turmush tarzining barcha sohalarini qamrab olishi mumkin. Inqirozni keltirib chiqaruvchi sabablar turlicha bo‘ladi. Aytaylik, ma’lum bir tuzumlar, ijtimoiy-iqtisodiy munosabatlar avvalboshdanoq taraqqiyotning obyektiv qonuniyatlarini inkor qilgan holda amal qilgani tufayli tanazzul holati yuz beradi. Shu bilan birga, o‘z vaqtida ilg‘or sanalgan tuzum va munosabatlar vaqti kelib taraqqiyotga g‘ov bo‘lib qolishi, yangicha talablarga javob bera olmasligi mumkin. Bu hol ham tabiiy tarzda inqiroz holatlarini keltirib chiqaradi. Iqtisodiy inqiroz jamiyat obyektiv qonuniyatlariga zid bo‘lgan iqtisodiy faoliyat tufayli yuz beradigan bo‘lsa, ma’naviy va ruhiy inqirozga inson kamolotining ma’naviy va ruhiy jihatlariga nomutanosib bo‘lgan jarayonlar, voqea va hodisalar sabab bo‘ladi. Jamiyatdagi inqiroz holatlarining oldi olinmasa, u boshqa sohalarga ham o‘z ta’sirini o‘tkazishi mumkin.