Inqilob (arabcha ag‘darilmoq, to‘ntarilmoq) – tabiat, jamiyat yoki tafakkur rivojida ro‘y beradigan tub sifat o‘zgarishi, bir sifat holatidan ikkinchi sifat holatiga o‘tish jarayoni. Inqilob ijtimoiy, siyosiy, geologik, ilmiy-texnikaviy, madaniy sohalar mohiyatini anglatuvchi tayanch sifat o‘zgarishlarini belgilaydigan atama tarzida qo‘llanadi. Inqilob miqdor o‘zgarishlarining falsafiy kategoriyasi bo‘lib, tabiat va jamiyat taraqqiyotining bosqichma-bosqichligi, tadrijiy (evolyutsion) rivojlanishidagi holatidan keskin sifat o‘zgarishlariga o‘tish jarayonlarini anglatadi. Inqilob bilan tadrijiylik o‘rtasidagi o‘zaro nisbatlar masalasi ijtimoiy tafakkurning eng dolzarb va murakkab muammosi bo‘lib, juda uzoq muddat davomida shiddatli sodir bo‘layotgan bahs-munozaralar mavzusini tashkil etadi. Inqilobiy taraqqiyot o‘rniga tadrijiy rivojlanishni qo‘llab-quvvatlash hozirgi kunda insoniyat taraqqiyotida amal qilayotgan umuminsoniy manfaat va qadriyatlar ustuvorligi qonuniyati mohiyatidan kelib chiqayotgan zarurat bo‘lib, ular dunyodan o‘zaro qarama-qarshi turish (barbod qilish)dan ko‘ra har tomonlama hamkorlik (yaratuvchanlik)ka asoslangan taraqqiyotning naqadar samarali ekanini ifoda etadi.