“Muhammad ismi haqida maʼruza qilganda bir domla: «Kim «Muhammad” ismli bolani soʻksa imondan chiqadi va nikohi buziladi», — dedilar. Muhammad ismiga yana bir ism qoʻshib qoʻyilgan boʻlsa ham shunday boʻladimi?» Oʻzbekiston musulmonlari idorasi fatvo hayʼati mazkur savolga javob berdi.

“Muhammad” ismi paygʻambarimiz (s.a.v.)ning ismlari ekani maʼlum. Agar bu ismni biror insonga qoʻyilsa, oʻsha insonning ismi hisoblanadi. Bu insonni chaqirilsa yoki ismi aytilsa, unga salovat aytish kabi Rasululloh (s.a.v.)ga oid hukmlar qilinmaydi. Savolda soʻralgan narsa ham mana shundan kelib chiqadi. Agar Muhammad ismini aytib Rasulullohni nazarda tutib soʻksa, u shaksiz dindan chiqadi. Biroq shu ismli bolani soʻkishi bilan bu hukm sobit boʻlmaydi. Chunki ota bolani tarbiyalashi uchun ayrim holatda qattiqqoʻllik qilishiga toʻgʻri keladi. Biroq bunday nomdagi insonga shu ism qoʻyilsa, unga ehtirom qilishi afzal sanaladi. Uni qisqartirib, yoki boshqacha qilib aytishi mumkin emas, deyiladi unda.