Internatsionalizm, baynalmilalchilik (lotincha inter – aro, natio – xalq) – turli millat, irqdagi kishilarning xalqaro birdamligini ifoda etadigan tushuncha. Internatsionalizm tarixiy taraqqiyotning ma’lum bosqichida, millatlarning kelib chiqishi va millatlararo munosabatlar natijasida muomalaga kiritilgan tushunchadir. Internatsionalizmning tub mohiyatini insonparvarlik, tolerantlik g‘oyalari, xalqaro hamdo‘stlik, birdamlik, hamjihatlik kabi umuminsoniy tamoyillar tashkil qiladi. Internatsionalizmni burjua davlatlarining kelib chiqishi bilan bog‘liq holda izohlash masalaga noto‘g‘ri yondashish demakdir. Tarix saboqlariga ko‘ra, xalqaro hamdo‘stlik va hamkorlik tamoyillari jahon xalqlarining turmush tarzida hamisha mavjud bo‘lgan. Internatsionalizm g‘oyasi Aflotun, Arastu, Forobiy, Ibn Sino, Nizomiy, Navoiy va boshqa allomalarning asarlarida atroflicha bayon etilgan. Internatsionalizm tushunchasini sinfiy, siyosiy va mafkuraviy jihatdan ta’riflash uning umuminsoniy mohiyatini soxtalashtirishga sabab bo‘ladi. Internatsionalizm g‘oyalari va tamoyillarining uzluksiz rivojlanib borishi umuminsoniy demokratik qadriyatlar ta’sirining kuchayishi, jahonda xalqaro tolerantlikning barqarorligi bilan bog‘liqdir. Bugungi kunda yurtimizda 130 dan ziyod millat va elat vakillarining o‘zaro ahil, tinch-totuv yashab kelayotgani, Vatan va mamlakatning gullab-yashnashi uchun bir yoqadan bosh chiqarib mehnat qilayotgani internatsionalizmning amaldagi haqiqiy ifodasidir.