Intelligensiya (lotincha intellegere – bilimli bo‘lish) – ijtimoiy tizimda muayyan o‘ringa ega bo‘lgan, asosan aqliy mehnat faoliyati bilan shug‘ullanadigan ziyolilarning ijtimoiy tabaqasi. Aqliy, ijodiy mehnat sohasini asosiy kasb tarzida tanlagan odamlar guruhi qadimdan ijtimoiy mehnat taqsimoti natijasida alohida ijtimoiy tabaqa sifatida shakllana boshlagan va bu jarayon o‘rta asrlardan yangi davrga o‘tish davrida asosan tugallangan. Intelligensiyaga mansub odamlar avval erkin bilim olish orqali aqliy mehnat faoliyatini boshlagan. Keyinchalik ular o‘quv yurtlarida bilim olish bilan birga, mehnat sohasini muayyan tizimga tushirishga ham erishgan. Intelligensiya vakillari barcha ijtimoiy guruhlardan kelib chiqqan bo‘lishi mumkin. Lekin intelligensiya ijtimoiy tabaqasining o‘zini o‘zi takroriy vujudga keltirish (qayta ishlab chiqarish) jarayoni hozirgi davrda o‘ziga xos holat sifatida amal qilmoqda. "Kompyuter asri", "Yangi texnologiyalar asri", "Axborot asri" degan nomlar bilan atalayotgan bu zamonda intelligensiyaning o‘rni va ahamiyati yanada ortib bormoqda. Ayniqsa, rivojlangan mamlakatlarda ijtimoiy tizim tobora intelligensiyalashib (ziyolilashib), uning miqdor va sifat darajalari tobora oshib borayotgani hozirgi davr jahon sivilizatsiyasiga xos umumiy qonuniyati sifatida e’tirof etilmoqda.