Immunitet (lotincha immunillare – biron narsadan xalos bo‘lish, qutulish) – organizmning doimiy ravishda o‘z ichki barqarorligini saqlashi, turli xususiyatlarga ega tashqi ta’sirlardan, xususan, infeksiyalar kirib kelishidan himoyalanishga qodir bo‘lgan reaksiyalar majmuasi. Inson butun hayoti davomida tashqi ta’sirga javoban aks sadolar sifatida orttirgan bilim va malakalari asosida o‘zida immunitet tizimini shakllantiradi.

Oxirgi paytlarda mamlakatimizda inson ma’naviyatiga nisbatan ham immunitet atamasini ishlatilmoqda. Bunda inson ongu tafakkuri, uning bilim saviyasi bilan bog‘liq holda immunitet tizimining asosiy qismlari sifatida quyidagilar ajratib ko‘rsatilmoqda:

1) voqelikni to‘g‘ri va to‘liq aks ettiradigan, inson ma’naviyatining boyishi va jamiyat taraqqiyotiga xizmat qiladigan bilimlar;

2) shunday bilimlar zamirida shakllanadigan va mafkuraviy tajovuzlar qarshisida mustahkam qalqon bo‘lib xizmat qiladigan qadriyatlar tizimi;

3) ijtimoiy-iqtisodiy, siyosiy va madaniy-ma’rifiy sohalardagi aniq mo‘ljal va maqsadlar.

Mafkuraviy immunitet tizimi ma’naviy barkamol, irodasi baquvvat, iymoni butun shaxsni tarbiyalashda, har qanday reaksion va buzg‘unchi g‘oyaviy tajovuzlarga, ma’naviy tahdidlarga munosib zarba bera oladigan yoshlarni kamol toptirishda qo‘l keladi.