Zukko (arabcha aqlli, zehni o‘tkir; idrokli, donishmand) – donolik, aqllilikni ifodalaydigan insoniy fazilat sohibini anglatuvchi tushuncha. Aniq fikrli, teran tafakkurli, ziyrak, "yetti o‘lchab, bir kesadigan", chuqur o‘ylab ish ko‘radigan kishini zukko odam deyishadi. Zukkolik insonga xos ma’naviy fazilatlardan biri bo‘lib, ibratga loyiqdir. Chunki zukko kishilar har bir ishning ostida yashiringan ma’nolarni, uning oqibatlarini chuqur his etadilar. Zukkolikning ozig‘i – ilmuma’rifat. Ammo o‘z bilimlarini hayotda to‘g‘ri qo‘llay bilgan farosat egasigina zukko inson darajasiga ko‘tarila oladi. "Donoga ilm – ilm, nodonga esiz ilm", deydi xalqimiz. Shuning uchun ham Forobiy "Fozil odamlar shahri" asarida inson ega bo‘lishi lozim bo‘lgan fazilatlar ichida zukkolikka alohida e’tibor qaratgan. Vatan va millat kelajagi haqida qayg‘urgan A.Avloniy ham kelajak zukko kishilar qo‘lida ekanini qayta-qayta ta’kidlagan: "Hushyor va ziyrak kishilar kuch va quvvatlari bor vaqtida keladurgan zamonlarni tushunib, pul va mollarini o‘rinsiz yerlarga, to‘y va ma’rakalarga haddan ortuqcha isrof qilmaslar, o‘zlarining rohati, bola-chaqalarining saodati uchun kerak bo‘ladurgan yer va bog‘larini sotmaslar, zamonaga muvofiq kishi qilmak to‘g‘risida oqchalarini aslo qizg‘onmaslar". Zukko kishi har bir gapini o‘rni, vaqti, joyini topib gapiradi, so‘zlarini behuda sarflamaydi, yomon so‘z bilan o‘zgalarning dilini og‘ritmaydi: "Har kishining fikr, idrokin so‘zi bildirg‘usi, Pistai bemag‘z, agar lab ochsa, rasvo bo‘lg‘usi" (A.Avloniy). Xalq doimo zukko odamlarni qadrlagan, ularni ibrat qilib ko‘rsatgan, zukkolikni donolikning bosh belgisi deb bilgan. Bunga o‘zbek xalqining ko‘plab maqollari, hikmatlari misol bo‘la oladi, jumladan: "Dono hikmat keltirar, nodon – kulfat", "Yigitning zehnli bo‘lgani – adashmay yo‘lidan yurgani" va hokazo. Xalq farovonligi va jamiyat barqarorligi fuqaro va rahbarlarning aqlu farosati, zukkoligiga ko‘p jihatdan bog‘liq. Zero, zehnli, zukko odam keng fikrlaydi, har bir ishning oxirini o‘ylab harakat qiladi va o‘z zimmasiga yuklatilgan vazifalarni o‘z vaqtida, aql bilan ado etadi.