Zamonaviylik – muayyan zamon o‘zgarishlari va davr da’vatini, taraqqiyot talablarining mazmun-mohiyatini chuqur his etib yashash; hayotda har tomonlama o‘tkir va dolzarb ahamiyat kasb etayotgan masalalar, davrning o‘zi kun tartibiga keskin qilib qo‘yayotgan yangi vazifalarni bajarish borasidagi hozirjavoblikni anglatadigan tushuncha. Ushbu tushuncha bugungi avlodning o‘zi boshidan kechirayotgan aniq tarixiy vaqt kesimi bilan hamnafas, hamfikr ekanini, o‘zini o‘tmish, bugungi kun va qolaversa, kelajak oldida mas’ulligini anglashi, zamonaviy hodisalarni aniq tasavvur qila olish qobiliyatini ifodalaydi. Zamonning barcha talablarini chuqur his etish, ya’ni tarixni yaxshi bilish va his etish, bugungi kun xususiyatlarini teran anglash va faol bo‘lish, kelajakni yaxshi tasavvur etish va aniq maqsadga ega bo‘lish – bularning barchasi shaxs ma’naviyatining muhim ko‘rsatkichlaridir. Demak, aynan shunday salohiyatga ega bo‘lgan kishilargina zamonaviy tafakkurga ega bo‘lishi va o‘z kelajagiga chuqur ishonch bilan qaray olishi mumkin.